ئێران: بەردەوام دەبین لە دانوستان لەگەڵ ئەمریکا

ئاڤا نیوز

وەزیری دەرەوەی ئێران دەڵێت، دانوستانەکانیان لەگەڵ ئەمریکا بەردەوام دەبێت و گەڕی پێنجەم 'بەمزووانە' ئەنجام دەدرێت.

وێنە گەورەکە: ئەمریکا و ئێران چوار خولی دانوستانی ناڕاستەوخۆیان لەسەر بەرنامە ئەتۆمییەکەی ئێران  ئەنجامداوە، بەڵام تاوەکو ئێستا هەردوو لا لەسەر چەندین پرس ناکۆکن، ئەمریکا چەندین جار دووپاتیکردووەتەوە نابێت ئێران بە هیچ شێوەیەک ببێتە خاوەنی چەکی ئەتۆمی.

لێدوانی فەرمی: عەباس عێراقچی، وەزیری دەرەوەی ئێران ڕایگەیاند: بەمزووانە پێنجەمین خولی دانوستانە ناڕاستەوخۆکانی نێوان ئێران و ئەمریکا لەسەر بەرنامە ئەتۆمییەکەی تاران ئەنجام دەدرێت و کات و شوێنی دانوستانی پێنجەم لە لایەن عومانەوە بە فەرمی ڕادەگەیەنرێت.

زانیاریی زیاتر: دوایین خولی دانوستانەکان هەفتەی ڕابردوو لە شاری مەسقەت بەڕێوەچوو و عێراقچی ئاشکرایکرد، لە چوارەم خولی دانوستانەکانی نێوان ئەمریکا و ئێران دانوستانەکانمان جدیتر و ڕاشکاوانەتر بوون، پیاتاندنی یۆرانیۆم و هەڵگرتنی سزاکان تەوەری سەرەکی گفتوگۆکان بوون.