وەزارەتی ئەوقاف هەواڵی گیانلەدەستدانی یەکەم حەجخوازی کورد ڕەت دەکاتەوە

ئاڤا نیوز

بەڕێوەبەری گشتیی حەج و عومرە كە لە هەمان كاتدا سەرۆكی شاندی حاجییانی هەرێمی كوردستانە تایبەت بۆ ئاڤا، دەنگۆی مردنی حەجخوازێکی هەرێمی كوردستان ڕەت دەكاتەوە و دووپاتی دەكاتەوە سەرجەمیان سەلامەتن.

چیرۆکی سەرەکی: دوای بەڕێكەوتنی حەجخوازانی هەرێمی كوردستان بەهەردوو ڕێگەی وشكانی و ئاسمانی بەرەو سعوودیە بەمەبەستی بەجێگەیاندین فەریزەی حەج، لە چەند پەیج و دەزگایێكی میدیایی دەنگۆی گیان لەدەستدانی حەجخوازێکی كورد لە سعوودیە بڵاوكرایەوە.

لێدوانی فەرمی: شێخ نیاز نەقشبەندی، سەرۆکی شاندی حاجییانی هەرێمی کوردستان بۆ ئاڤا میدیا ڕایگەیاند، هیچ حەجخوازێکی فەرمیی ئەمساڵی هەرێمی کوردستان گیانی لەدەست نەداوە و دڵنیاییشی دا لەوەی هەر كاروانێكی حەجخوازان، تیمی پزیشكی تایبەتی لەگەڵدایە.

زانیاریی زیاتر: سەرۆکی شاندی حاجییانی هەرێمی کوردستان زیاتر گوتی، میدیاکان نەکەونە ژێر کاریگەریی هەواڵی ساختە. سەرچاوەی زانیاریی دەربارەی حەجخوازان، تەنیا بەڕێوەبەرایەتیی گشتیی حەج و عومرەی هەرێمی کوردستانە.

بەتەنیشت ئەم بابەتەوە: كاروان ستوونی، وتەبێژی بەڕێوەبەرایەتیی حەج و عومرەی هەرێمی كوردستان تایبەت بە ئاڤا ڕایگەیاند، كاروانی حاجییانی كوردستان ئێستا لە شارەكانی مەككە و مەدینەن و سەرجەمیان سەلامەتن.