عێراق و ئێران تاوتوێی پرسی غاز دەکەن

ئاڤا نیوز

هەردوو وەزیرانی دەرەوەی عێراق و ئێران، هاوکاری دووقۆڵی و کۆمەڵێک بابەتی هاوبەش بە تایبەتی پرسی غازیان تاوتوێ کرد.

چیرۆکی سەرەکی: فوئاد حوسێن، وەزیری دەرەوەی عێراق لەگەڵ عەباس عێراقچی، هاوتا  ئێرانییەکەی لە پەراوێزی لووتکەی "گفتوگۆی تاران" کۆبوونەوە و پرسە هاوبەشەکانی نێوانیان تاوتوێ کرد.

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق، فوئاد حوسێن لە کۆبوونەوەکەدا، ئاماژەی بە گرنگی کاراکردنی کاری لیژنە هاوبەشەکانی نێوان هەردوو وڵات کرد و باسی لە کاریگەریی گەمارۆکان لەسەر دابینکردنی غازی ئێران بۆ عێراق کرد.

وەزیری دەرەوە پشتیوانی عێراقی بۆ پرۆسەی دانوستانی نێوان تاران و واشنتن دووپات کردەوە و بە "رێگایەکی گرنگ بۆ گەیشتن بە سەقامگیری لە ناوچەکە" ناوی برد.

لەلایەکی دیکەوە: عەباس عێراقچی، وەزیری دەرەوەی ئێران پێزانینی خۆی بۆ بەشداری چالاکانەی عێراق لە کۆڕبەندەکەی تاران دەربڕی و ئامادەیی ئێرانی بۆ درێژەدان بە دانوستانە ئەتۆمییەکان لەگەڵ ئەمریکا دووپاتکردەوە و ڕۆڵی عێراقی لە ڕەخساندنی هەلومەرجی گونجاو لە بواری دیپلۆماسی بەرز نرخاند.