کرێملین: ڕێککەوتنی ئاشتی لەگەڵ ئۆکراینا ئاڵۆز دەبێت

ئاڤا نیوز

 

کۆشكی سەرۆکایەتیی ڕووسیا 'کرێملین' ئاشکرای دەکات، داڕشتنی یاداشتنامەی لێکتێگەیشتن لە نێوان مۆسکۆ و کیێڤ سەبارەت بە ئاگربەست و پرۆسەی ئاشتی ئاڵۆز دەبێت.

وێنە گەورەکە: سەرەڕای تەواوی هەوڵەکان تاوەکو ئێستا هیچ ئاگربەستێکی هەمیشەیی بۆ ڕاگرتنی شەڕی ڕووسیا و ئۆکراینا نەهاتووەتە ئاراوە، ڕووسیا پرۆسەکە بە قورس و ئاڵۆز ناو دەبات و ئەمریکاش سوورە لەسەر ڕاگرتنی جەنگی سێ ساڵەی نێوان هەردوولا

 

لێدوانی فەرمی: دیمیتری پێسکۆڤ، وتەبێژی کرێملین ڕایگەیاند، داڕشتنی یاداشتنامەی لێکتێگەیشتن لە نێوان مۆسکۆ و کیێڤ لەبارەی ئاگربەست و ڕێککەوتنی ئاشتی پرۆسەیەکی ئاڵۆز دەبێت، ناتوانرێت وادەیەک دیار بکەین بۆ گەیشتن بە ڕێککەوتنی کۆتایی.

 

زانیاریی زیاتر: دۆناڵد ترەمپ، سەرۆکی ئەمریکا و ڤلادیمێر پووتین، سەرۆکی ڕووسیا پەیوەندییەکی تەلەفۆنیان ئەنجامدا، ترەمپ ڕایگەیاند، پەیوەندییە تەلەفۆنییەکە زۆر بەباشی لەگەڵ پووتین بەڕێوەچوو، ڕووسیا و ئۆکراینا دەستبەجێ دانووستانەکان بەرەو ئاگربەست و لەوەش گرنگتر کۆتایی هاتنی جەنگ دەست پێدەکەن، هەردوولایان لەسەر مەرجەکانیان گفتوگۆ دەکەن، چونکە خۆیان وردەکارییەکان دەزانن لای خۆیەوە پووتین ئامادەیی وڵاتەکەی دەربڕی کە لەگەڵ کیێڤ کار لەسەر یاداشتێک بکات سەبارەت بە پەیماننامەی ئاشتی داهاتوو