مەسرور بارزانی: وەبەرهێنان لە وزە پەیوەندییەکانمان لەگەڵ ئەمریکا قووڵتر دەکات

ئاڤا نیوز

 

دوای واژۆکردنی دوو گرێبەست لە بواری وەبەرهێنانی نەوت و غاز لەگەڵ دوو کۆمپانیای ئەمریکا، سەرۆکوەزیران مەسرور بارزانی دەڵێت: وەبەرهێنان لە وزە و ئابووری دەتوانێت پەیوەندییەکانمان لەگەڵ ئەمریکا قووڵتر بکاتەوە'.

 

وێنە گەورەکە: ڕۆژی 19-5-2025، دوو گرێبەست لە بواری نەوت و وزە لەنێوان کۆمپانیاکانی 'ئێچ کەی ئینێرژی' و 'وێستێرن زاگرۆس'ی ئەمریکی، لەگەڵ وەزارەتی سامانە سرووشتییەکانی حکومەتی هەرێمی کوردستان واژۆ کرا.

 

لێدوانی فەرمی: سەرۆکوەزیران مەسرور بارزانی، دوای واژۆکردنی گرێبەستەکان لەمیانی پێشکەشکردنی وتارێکدا، ڕایگەیاند: پەیوەندییەکانمان لەگەڵ ئەمریکا بۆ ساڵانێکی زۆر لەمەوپێش دەگەڕێتەوە، کاتێک دژی زۆرداری و داعش شەڕمان دەکرد و ئاسایشمان دابین دەکرد، ئەوکاتە کۆمەڵێک ئامانجی هاوبەشمان پێكەوە هەبوو.

 

-لە سەروی ئاسایش و تیرۆرەوە، ئێمە هاوبەشییەکی دیکەمان هەیە، پێمانوایە وەبەرهێنان لە بواری وزە و گەشەپێدانی ئابووری دەتوانێت پەیوەندییەکانمان قووڵتر بکاتەوە، ئەو پەیوەندییەش کە هەیە بەهێزتری بکات.

 

- پیرۆزبایی ئەم هاوبەشییە لە کۆمپانیاکان و هەروەها هەموو لایەک لە هەرێمی کوردستان بۆ ئەم دەستکەوتە دەکەم.

 

ئەوەی پێویستە بیزانیت: ئەو دوو ڕێککەوتنەی لەگەڵ دوو کۆمپانیا ئەمریکییەکە واژۆکراوە، بەهاکەی دەیان ملیار دۆلارە، کاریگەریان لەسەر پێشخستنی کەرتی نەوت و وزە و ژێرخانی ئابووری هەرێمی کوردستان دەبێت.