ئێران هەڕەشەی کۆتاییهێنان بە دانوستانەکان لەگەڵ ئەمریکا دەکات

ئاڤا نیوز

سەرچاوە ئێرانییەکان بڵاویانکردەوە، حکومەتی ئێران دەیەوێت کۆتایی بە دانوستانە ناڕاستەوخۆکانی لەگەڵ ئەمریکا بهێنێت بەهۆی مەرجەکانی ئەو وڵاتەوە.

 

زانیاریی بەدەستهاتوو: ڕۆژی سێشەممە 20-5-2025،  کەناڵی سکای نیوز لە زاری سەرچاوە ئێرانییەکان بڵاویکردەوە، بەهۆی ئەوەی ئەمریکا پێداگیرە لەسەر ڕاگرتنی پیتاندنی یۆرانیۆم لەلایەن ئێرانەوە، تاران تا ئێستا پلانی نییە بۆ  گەڕی پێنجەمی دانوستانەکانی لەگەڵ ئەمریکا، هاوکات هەڕەشەی کۆتایی هێنان بە دانوستانەکان دەکات.

لێدوانی فەرمی: مەجید تەخت ڕەوانچی، جێگری وەزیری دەرەوەی ئێران ڕایگەیاند: ئێران تاوتوێی ئەنجامدانی پێنجەمین گەڕی دانوستانەکانی لەگەڵ ئەمریکا دەکات و تا ئێستا بڕیارێکی گشتگیر نییە بەهۆی مەرجەکانی ئەمریکا بۆ وەستاندنی پیتاندنی یۆرانیۆم.

ئەوەش بزانە: پێشتر ستیڤ ویتکۆف، نێردەی تایبەتی دۆناڵد ترەمپ، سەرۆکی ئەمریکا بۆ ڕۆژهەڵاتی ناوەڕاست گوتی، واشنتن ڕێگە نادات تاران تەنانەت 1%ی توانای  پیتاندنی یۆرانیۆمی هەبێت و بە هێڵی سووری دەزانێت، عێراقچیش لە وەڵامی ئەو لێدوانە گوتی، ئێران بەردەوام دەبێت لە پیتاندنی یۆرانیۆم، چ بگاتە ڕێککەوتن یان نا لەگەڵ ئەمریکا.