مەسرور بارزانی ئاڤا: لەگەڵ ئەمریکا دۆستایەتییەکی دێرین و مێژووییمان هەیە

ئاڤا نیوز

 

دوای واژۆکردنی دوو گرێبەست لە بواری وەبەرهێنانی نەوت و غاز لەگەڵ دوو کۆمپانیای ئەمریکا، سەرۆکوەزیران مەسرور بارزانی ڕایگەیاند، هاتنی کۆمپانیا ئەمریکییەکان بۆ هەرێمی کوردستان سوودی بۆ هەردوولا دەبێت. 

 

وێنە گەورەکە: ڕێککەوتی 19-5-2025، بە ئامادەبوونی سەرۆکوەزیران مەسرور بارزانی لە ویلایەتە یەکگرتووەکانی ئەمریکا، دوو گرێبەست لە بواری نەوت و وزە لەنێوان کۆمپانیاکانی 'ئێچ کەی ئینێرژی' و 'وێستێرن زاگرۆس'ی ئەمریکی و وەزارەتی سامانە سرووشتییەکانی هەرێمی کوردستان واژۆ کرا.

 

لێدوانی فەرمی: سەرۆکوەزیران مەسرور بارزانی لە لێدوانێکی تایبەتدا بە ئاڤا میدیای ڕایگەیاند، لەگەڵ ئەمریکا دۆستایەتییەکی کۆنمان هەیە، پێمان خۆشە کۆمپانیا ئەمریکییەکان بێن لە هەرێمی کوردستان وەبەرهێنان بکەن، ئەمەش سوودی بۆ هەردوولا دەبێت.

 

لە بەشێکی دیکەی قسەکانیدا سەرۆکوەزیرانی کوردستان گوتیشی، کاتێک پەیوەندی و بەرژەوەندیی هاوبەش تێکەڵ دەبن، ئەو پەیوەندییە دەچێتە بوارێکی دیکە و قووڵتر دەبێت، کە لە بەرژەوەندی هەموولایەک دەبێت.

 

لەلایەکی دیکە: هەر دوای واژۆکردنی گرێبەستەکان، سەرۆکوەزیرانی کوردستان لە تۆڕی کۆمەڵایەتیی ئێکس ڕایگەیاند: ''قۆناغێکی نوێی پەیوەندییەکانی نێوان کوردستان و ئەمەریکا دەست پێدەکات. گوتیشی، بە واژۆکردنی دوو ڕێککەوتننامەی گرنگ لەگەڵ HKN Energy و WesternZagros Resources کە بەهایان دەیان ملیار دۆلارە، کارەبا بۆ ملیۆنان کەس دابین دەکات و هەلی کار دەڕەخسێنێت و ئابووری کوردستان بەهێزتر دەکات.''

 

خاڵە ئەرێنییەکان: سەبارەت بە ئامانجی گرێبەستەکان، بەگوێرەی وەزارەتی سامانە سرووشتییەکان، پڕکردنەوەی پێداویستی ناوخۆییە لە ڕێگای زیادکردنی بەرهەمی گازی سروشتیی بۆ دابینکردنی سووتەمەنی وێستگەکانی بەرهەمهێنانی کارەبا بە ئامانجی پێشکەشکردنی خزمەتگوزاریی کارەبای بەردەوام بۆ هەموو ناوچەکانی عێراق.

 

ئەوەی پێویستە بیزانیت: کۆمپانیای نەوتی ئەمەریکی ئێچ کەی ئێن ئینێرجی لە کێڵگەی گازی میران لە بازیان و وێستێرن زاگرۆس لە  بلۆکی هاوبەشی کێڵگەی تۆپخانە-کوردمیر لە گەرمیان دەست بەکارکردن دەکەن و بەهای ڕێککەوتنەکە 110 ملیار دۆلارە و پرۆژەکان بە چەند قۆناغێک جێبەجێدەکرێن.