فایلی خەڵک؛ لە بازگەکانی حەشدی شەعبی ڕێگری لە بەرهەمی جووتیارانی کورد دەکرێ

ئاڤا نیوز

کێشەی جووتیارانی کورد لە بازگەکانی حەشدی شەعبی بەردەوامە و ڕێگرییان لێدەکرێت بەرهەمەکانیان دەرباز بکەن بۆ بازاڕەکانی ناوەڕاست و باشووری عێراق و سەرزەنیشتیش دەکرێ.

چیرۆکی سەرەکی: بەشێک لە جووتیارانی دەشتی هەولێر توڕە و نیگەرانن لەوەی لە بازگەکانی نێوان شارەکانی کوردستان و عێراق، بەتایبەتی بازگەکانی حەشدی شەعبی ڕێگرییان لێ دەکرێ و سەرزەنشت دەکرێن، هەروەها ڕێگە نادەن بەرهەمەکانیان بنێرن بۆ بازاڕەکانی ناوەڕاست و باشووری عێراق، ئەوەی ڕێگەشی پێبدرێ، وەکو بەرتیل داوای کۆڵێک پارەی لێ دەکرێت.

لەلایەکی دیکەوە: ئەم جووتیارە کوردانە نیگەرانن لەوەی لە دەروازە سنورییەکانی سلێمانییەوە بەرووبوومی کشتووکاڵی ئێرانی بە فەرمی و نافەرمی دەهێندرێتە بازاڕەکانی کوردستانەوە، ئەمەش وای کردووە بەرهەمی جووتیارانی کورد لەبازاڕەکانی کوردستان و عێراق ساغ نەبێتەوە. هەندێک لە جووتیارەکان، ناچارن ئاژەڵ بەردەنە بەرهەمەکانیان، چونکە وەکو خۆیان دەڵێن، "بۆمان دەرناهێنێ پارەی کرێکار بدەین و بیبەینە بازاڕەوە بیفرۆشین، ئەوە باشترە بیدەینە ئاژەڵەکانمان".

لێدوانی فەرمی: وەزارەتی کشتووکاڵ و سەرچاوەکانی ئاو دەڵێت، "ئێمە هەموو ئاسانکارییەک بۆ جووتیارانی خۆمان دەکەین و چەند جارێکیش ئەم بەزمانەی کە بازگەکانی عێراق بە جووتیارانی کوردی دەکەن، بە بەرپرسانی حکومەتی عێراقمان گەیاندووە".