وەزارەتی دەرەوەی ئەمریکا: خۆشحاڵین بە فراوانبوونی پەیوەندییەکانمان لەگەڵ کوردستان

ئاڤا نیوز

 

وەزارەتی دەرەوەی ئەمریکا خۆشحاڵی خۆی بە فراوانبوونی پەیوەندییەکانی ئەمریکا و هەرێمی کوردستان دەردەبرێت و ڕایدەگەیێنێت، گرێبەستە واژۆکراوەکانی بواری وزە سوودی بۆ عێراق و ئەمریکاش هەیە.

 

ڕاگەیێنراوی فەرمی: وەزارەتی دەرەوەی ئەمریکا لە تۆڕی کۆمەڵایەتیی ئێکس، ڕاگەیێنراوێکی لەبارەی واژۆکردنی گرێبەستەکانی نێوان هەرێمی کوردستان و کۆمپانیا ئەمریکییەکان لەبواری وەبەرهێنان لە کەرتی وزە بڵاوکردووەتەوە و دەڵێت، "خۆشحاڵین بە بینینی فراوانبوونی پەیوەندی ئابووریی نێوان ئەمریکا و هەرێمی کوردستان دوای واژۆکردنی گرێبەستەکان لەگەڵ کۆمپانیا ئەمریکییەکان، ئەم هاوبەشییانە بەرهەمهێنانی غاز لە عێراق بەهێزتر دەکات و سوودی بۆ خەڵکی هەردوولا دەبێت".

 

باکگراوند: ڕۆژی دووشەممە ڕێککەوتی 19-5-2025، بە سەرپەرشتی سەرۆکوەزیران مەسرور بارزانی، وەزارەتی سامانە سروشتییەکانی کوردستان و کۆمپانیاکانی 'ئێچ کەی ئینێرجی' و 'وێسترن زاگرۆس'ی ئەمریکی، دوو گرێبەستیان لەبواری نەوت و وزە واژۆ کرد، گرێبەستەکان هەرێمی کوردستان و عێراق لەبواری وەبەرهێنان لە کەرتی غاز و نەوت دەباتە قۆناغێکی دیکەوە و جگە زیادکردنی بەرهەمهێنانی غاز و نەوت، وادەکات بەهۆیانەوە کارەبا بۆ هەموو عێراق لەڕێگای بەرهەمبهێنرێت.

 

لەلایەکی دیکە: وەزارەتی سامانە سرووشتییەکانی هەرێمی کوردستان لەبارەی ئامانجی گرێبەستەکانەوە دەڵێت، ئامانج لەو ڕێککەوتننامە و گرێبەستانەش، پڕکردنەوەی پێداویستی ناوخۆییە لە ڕێگای زیادکردنی بەرهەمی گازی سرووشتیی بۆ دابینکردنی سووتەمەنی وێستگەکانی بەرهەمهێنانی کارەبا بە ئامانجی پێشکەشکردنی خزمەتگوزاریی کارەبای بەردەوام بۆ هەموو ناوچەکانی عێراق.

 

ئەوەی پێویستە بیزانیت: ڕاگەیاندنی گرێبەستە 110 ملیار دۆلارییەکانی نێوان ئەمریکا و هەرێمی کوردستان کاردانەوەی میدیا جیهانییەکانی لێکەوتەوە و ئاژانسی ئەنادۆڵ گرێبەستەکان بە "گەورە" ناودەبات.