پارتی و یەکێتی بۆ یەکلاکردنەوەی وردەکارییەکانی ڕێککەوتنی نێوانیان کۆدەبنەوە

ئاڤا نیوز

 

شاندی دانوستاندنکاری پارتی دیموکراتی کوردستان و یەكێتیی نیشتمانیی کوردستان لە هەولێر کۆدەبنەوە و گفتوگۆ لەسەر تەواوکردنی ڕێککەوتنی نێوانیان بۆ دابەشکردنی پۆستەکانی کابینەی دەیەمی حکومەتی هەرێمی کوردستان دەکەن.

 

وێنە گەورەکە: پارتی دیموکراتی کوردستان و یەکێتیی نیشتمانیی کوردستان دوای زنجیرەیەک کۆبوونەوەی نێوانیان لەسەر ئاستی باڵا و شاندی دانوستانکار و تیمی تەکنیکی، هەردوو حیزب ڕەشنووسی کارنامەی کابینەی نوێی حکومەتیان یەکلاکردووەتەوە و تەنیا بابەتی دابەشکردنی پۆستەکان ماوە، لە کۆبوونەوەی ئەمڕۆشدا گفتوگۆ لەسەر ئەو بەشانەی ڕێککەوتنەکەیان دەکەن کە هێشتا یەکلانەبوونەتەوە و پێویستیان بە گفتوگۆ و دانوستانە.

 

لێدوانی فەرمی: پێش کۆبوونەوەکە، سەعدی ئەحمەد پیرە، گوتەبێژی یەکێتیی نیشتمانیی کوردستان بە عوبێد هەرکی، پەیامنێری ئاڤای ڕایگەیاند، " هەردوولا کۆک و هاوڕان لەسەر ئەوەی کە دەبێت پێش هەڵبژاردنی پەرلەمانی عێراق کابینەی دەیەمی حکومەتی هەرێمی کوردستان پێکبهێنرێت.

 

سەعدی پیرە گوتیشی، شاندەکە هەمان شاندی باڵای جارەکەی دیکە و تاوەکو ئێستاش هیچ پۆستێک یەکلایی نەکراوەتەوە. باسی لەوەش کرد، کۆبوونەوەکانی ڕابردووی نێوان مەسرور بارزانی و بافڵ تاڵەبانی کاریگەری ئەرێنی و زۆر باشی لەسەر کۆبوونەوەکان هەبووە.

 

زانیاریی تایبەت: ئاڤا زانیویەتی پێشنیوەڕۆی ئەمڕۆ چوارشەممە، لە هۆڵی سەعد عەبدوڵڵا لە هەولێر، شاندی دانوستاندنکاری پارتی و یەكێتی کۆدەبنەوە و پرسی دابەشکردنی پۆستەکانی کابینەی نوێ تەوەری سەرەکی گفتوگۆی کۆبوونەوەی ئەمجارەیان دەبێت.

 

زانیاریی زیاتر: هۆشیار زێباری، ئەندامی ده‌سته‌ی كارگێڕی مه‌كته‌بی سیاسیی، سەرۆکایەتیی شاندی پارتی دیموکراتی کوردستان دەکات و هەریەک لە پشتیوان سادق، د.ئومێد سەباح و دڵشاد شەهاب ئەندامی شاندەکەن، لای یەکێتیی نیشتمانیی کوردستانیشەوە قوباد تاڵەبانی سەرۆکایەتیی شاندەکە دەکات و دەرباز کۆسرەت، ڕێواز فایەق، نزار ئامێدی، شاڵاو شێخ سەڵاح ئەندامانی شاندەکەن.