سوودانی ژمارەیەک ئەفسەر لەپۆستەکانیان دوور دەخاتەوە

ئاڤا نیوز

دوابەدوای گیانلەدەستدانی دوو قوتابی کۆلێژی سەربازی ناسریە، سوودانی فەرمانی دەرکردن بۆ سەرجەم بەرپرسانی ئەو ڕووداوە دەردەکات و بڕیاری پێکهێنانی لیژنەیەکی لێکۆڵینەوە دەدات.

چیرۆکی سەرەکی: نیوەڕۆی ئەمڕۆ چوارشەممە 2025-05-21، دوو قوتابی کۆلێژی سەربازی ناسریە لە ئەنجامی بەرکەوتنی ڕاستەوخۆی خۆر و لەژێر تینی گەرما  بۆ ماوەی شەش کاتژمێری بەردەوام، گیانیان لەدەستدا.

ڕاگەیێنراوی فەرمی: سەباح نوعمان، گوتەبێژی فەرماندەی گشتی هێزە چەکدارەکانی عێراق لە ڕاگەیێنراوێکدا ڕایگەیاند: محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکانی عێراق، فەرمانی دوورخستنەوەی هەر یەکە لە سەرۆکی ئەکادیمیای سەربازی و یاریدەدەرەکەی و ڕاگری کۆلێژی سەربازی چوارەم و فەرماندەی فەوجی پەیوەندیدار لە ئەرکەکانیان داوە.

زانیاریی زیاتر: سوودانی فەرمانی پێکهێنانی لیژنەیەکی لێکۆڵینەوە بۆ ئاشکراکردنی لایەنە کەمتەرخەمەکان و گرتنەبەری ڕێکاری یاسایی بەرامبەریان دەرکرد، هاوکات ڕێنمایی دا پلەی مولازم بەهەردوو قوتابی بدرێت.

لەلایەکی دیکەوە: لە تۆڕە کۆمەڵایەتییەکان گرتەیەکی ڤیدیۆیی بڵاوکراویەوە، کە دۆخی قوتابییەکی کۆلێژی سەربازی لە ناسریە پیشان دەدات و ئاماژە بۆ ئەوە کرابوو کە 50 قوتابی لەو کۆلێژە دوای ئەوەی بۆ ماوەی چەند کاتژمێرێک لە ژێر تیشکی بەتینی خۆر بێ ئاو دەمێننەوە، بێهۆش دەبن. هەر بەو هۆیەوە باری تەندروستیی ژمارەیەکیان تێکدەچێت دەگوازرێنەوە بۆ نەخۆشخانە.