وەزارەتی دارایی عێراق لەبارەی پلەبەرزکردنەوەی فەرمانبەران گشتاندنێک دەردەکات

ئاڤا نیوز

 

وەزارەتی دارایی عێراق ڕایگەیاند، تا پەسەندکردنی خشتەی بودجەی ساڵی 2025 لە پەرلەمانی عێراق، هیچ زیادە مووچەیەکی پەیوەست بە فەرمانبەران خەرج ناکرێت، بەڵام داوا لە فەرمانگەکان دەکات لە ڕاییکردنی کاروباری پلەبەرزکردنەوەی فەرمانبەران لەڕووی کارگێڕییەوە بەردەوام بن.

 

ئەوەی پێویستە بیزانیت: لە مانگی یەکی ئەمساڵ و بەهۆی ئەوەی خشتەی بودجە پەسەندنەکراوە، وەزارەتی دارایی عێراق هەموو زیادە مووچەیەکی پەیوەست بە خزمەت، بڕوانامە و پلەی بەرزکردنەوەی فەرمانبەرانی ڕاگرتووە، بەڵام ئەگەر بودجە پەسەند بکرێت کۆی مانگەکانی ئەمساڵیان بەسەر یەکەوە بۆ خەرج دەکرێت، واتە مافەکانیان دوادەکەوێت بەڵام نافەوتێت.

 

نوسراوی فەرمی: سادق عەباس، بەڕێوەبەری گشتیی فەرمانگەی کارگێڕی و دارایی لە وەزارەتی دارایی عێراق لە نوسراوێکدا کە چوارشەممە دەریکردووە و ئاراستەی بەڕێوەبەرایەتییە گشتییەکانی وەزارەتەکەی کردووە، ئاماژەی بەوەشداوە، هەر چوار مانگ جارێک چاودێریی ڕێکارەکانی پلەبەرزکردنەوە، هەژمارکردنی بڕوانامە و ماوەی خزمەتکردنی فەرمانبەران بکرێت و دەبێت ڕێکارەکانیان تەواوبکرێن، هەر ئاستەنگییەکیش بۆیان بێتەپێش بە هەماهەنگی لەگەڵ پەرلەمان و حکومەت هەوڵی چارەسەرکردنیان دەدەن.

 

وەزارەتەکە داوا دەکات پرسیار و نوسراوی دووبارەی ئاڕاستە نەکرێت کە پێشتر وەڵامیان دراوەتەوە و بۆ خوێندنی فەرمانبەرانیش دەبێت بەتەواوی کار بە ڕێنماییەکان بکرێت.

 

پەیوەست بە خەرجکردنی مووچەی فەرمانبەرانیش دوای پلەبەرزکردنەوە و هەژمارکردنی خزمەت و بڕوانامە، وەزارەتی دارایی عێراق دەڵێت، تا پەسەندکردنی خشتەی بودجە لە پەرلەمانی عێراق هیچ زیادە مووچەیەک خەرج ناکرێت، بەڵام ئەگەر زیادکردنی مووچەکە لەسەر حسابی داهاتی خۆیی فەرمانگەکە بێت، دەتوانرێت فەرمانی خەرجکردنی بۆ دەربکرێت.