کەمبوونەوەی کارەبا عێراقییەکان تووشی هاوینێکی سەخت دەکات

ئاڤا نیوز

وەزارەتی کارەبای عێراق ئاشکرای دەکات، 17 هەزار مێگاوات کورتهێنانیان لە بەرهەمهێنانی کارەبا هەیە، هاوکات هاوینێکی سەخت چاوەڕێی هاووڵاتییان دەکات کە لە ڕۆژێکدا تەنیا 12 کاتژمێر کارەبای نیشتیمانییان پێدەدرێت.

وێنە گەورەکە: بە بڕیاری ئەمریکا هاوردەکردنی غاز لە ئێران بۆ عێراق قەدەغە کرا، بەمەش عێراق دووچاری کێشەی کەمی کارەبا دەبێتەوە. بەرپرسانی ئەو وڵاتە لە هەوڵی چارەسەرکردنی ئەو کێشەیەن، بەڵام تا ئێستا نەگەیشتوونەتە هیچ چارەسەرێک. 

لێدوانی فەرمی: ئەحمەد موسا، وتەبێژی وەزارەتی کارەبا بە ئاڤا میدیای ڕاگەیاند:

٠ بەرهەمهێنانی کارەبا لە ئێستادا 28 هەزار مێگاواتە، عێراق پێویستی بە زیاتر لە 55 هەزار مێگاوات هەیە، بەتایبەتی لە وەرزی هاویندا، بەو پێیەش کەلێنێکی گەورە لە نێوان بەرهەمهێنانی ڕاستەقینە و بەرهەمی پێویستدا هەیە.

٠ چەندین پرۆژەی کارەبا و وزە پارەیان بۆ تەرخانکراوە و ماوەی زیاتر لە ساڵێکە کاریان لەسەر دەکرێت، بەڵام پێویستمان بە دوو ساڵ هەیە بۆ تەواوکردنی ئەو پڕۆژانە و خستنە کاریانەوە.

٠ پێدەچێت وەزارەتی کارەبا لە وەرزی هاویندا لە 12 بۆ 14 کاتژمێر لە ڕۆژێکدا کارەبا دابین بکات، ئەمەش بڕی پێویستی هاووڵاتییان پڕ ناکاتەوە.

زانیاریی زیاتر: بە گوتەی وتەبێژی وەزارەتی کارەبا، پاڵپشتی پڕکردنەوەی کورهێنانی کارەبا دەکەن بە سوودوەرگرتن لە دەستپێشخەرییەکەی بانکی ناوەندی عێراق بۆ پێدانی قەرزی بچووک بە هاووڵاتییان بۆ کڕینی سیستەمی وزەی خۆر تا ئەو کاتەی پڕۆژەکانی وزە لەو دوو ساڵەی داهاتوودا تەواو دەبن.

ئەوەی پێویستە بیزانیت: ڕۆژی پێنجشەممە، وەزارەتی کارەبای عێراق ڕایگەیاند، سێ هەزار و 500 مێگاوات بەرهەمهێنانی کارەبا کەمیکردووە بەهۆی کەمکردنی پێدانی غازی ئێران بۆ عێراق لە ماوەی مانگی ئایاردا. وەزارەتەکە ئاماژەی بەوەشداوە کە گرفتەکە گەورەتر دەبێت لە مانگی داهاتوودا، پێشبینیش دەکات عێراق لە وەرزی هاویندا پێنج هەزار و 300 مێگاوات کەمبکاتەوە.