وەزارەتی گەنجینەی ئەمریکا بە فەرمی سەرجەم سزاکانی سەر سووریای هەڵگرت

ئاڤا نیوز

 

دوای دوو هەفتە لە بڕیاری هەڵگرتنی سزاکانی سەر سووریا لەلایەن دۆناڵد ترەمپ، سەرۆکی ئەمریکا. ئەمڕۆ وەزارەتی گەنجینەی ئەو وڵاتە بەفەرمی بڕیاری هەڵگرتنی سزاکانی سەر دیمەشقی خستە بواری جێبەجێکردنەوە.

وێنەگەورەکە: ڕۆژی شەممە، 24-5-2025، ئەمریکا بە فەرمی سەرجەم سزا سەپێنراوەکانی سەر سووریای هەڵگرت، ئەمەش وەک "هەنگاوێک بۆ دەستپێکردنی قۆناغێکی نوێ لە پەیوەندییەکانی نێوان هەردوو وڵات".

 

لێدوانی فەرمی: سکۆت بێسنت، وەزیری گەنجینەی ئەمریکا لە بەیاننامەیەکدا ڕایگەیاند: پێویستە  سووریا بەردەوام بێت لە کارکردن بۆ ئەوەی ببێتە وڵاتێکی سەقامگیر و ئارام، هیوادارین هەڵگرتنی گەمارۆ ئابوورییەکان ئایندەی وڵاتەکە بەرەو باشتر ببات.

 

بۆچوونی لایەنی بەرامبەر: وەزارەتی دەرەوەی سووریا پێشوازی لە بڕیارەکە کرد و  ڕایگەیاند: قۆناغێكی نوێ بۆ گەلی سووریا بۆ بووژانەوە و ئاوەدانکردووە دەستپێدەکات و پێشوازی لە هەموو ئەوانە دەکات کە دەیانەوێت هاوکاری و وەبەرهێنان لە وڵاتەکەمان بکەن.

 

ڕێککەوتنەکە بەمشێوەیە: وەزارەتی گەنجینەی ئەمریکا سزاکانی بەو مەرجە هەڵگرتووە، کە نابێت حکومەتی نوێی سووریا ببێتە پەناگەیەک بۆ ڕێکخراوە تیرۆرستییەکان و سەلامەتی سەرجەم پێکهاتە ئاینیی و نەتەوەییەکان دابین بکات.

 

لەلایەکی دیکە: مارکۆ ڕوبیۆ، وەزیری دەرەوەی ئەمریکا ڕایگەیاند، هەڵگرتنی سزاکان کارئاسانی بۆ دابینکردنی خزمەتگوزارییەکانی کارەبا، وزە، ئاو لە سەرتاسەری سوریا دەکات ". 

 

باکگراوند: لەسەروبەندی سەردانەکەیدا بۆ ڕۆژهەڵاتی ناوەڕاست، دۆناڵد ترەمپ، سەرۆکی ئەمریکا لە سعودیەوە بڕیاریدا سزاکانی سەر سووریا هەڵبگرێت. دواتریش ترەمپ لە ڕیازی پایتەختی سعودیە، لەگەڵ ئەحمەد شەرع، سەرۆککۆماری سووریا کۆبووەوە.