نێردەی تایبەتی سەرۆکی ئەمریکا سەردانی سووریا دەکات

ئاڤا نیوز

نێردەی تایبەتی سەرۆکی ئەمریکا بۆ سووریا، لەم هەفتەیە سەردانی سووریا دەکات و دیدار و کۆبوونەوەی لەگەڵ ئەحمەد شەرع و ئەسعەد شەیبانی دەبێت.

بۆچی گرنگە: دوای دوو هەفتە لە بڕیاری هەڵگرتنی سزاکانی سەر سووریا لەلایەن دۆناڵد ترەمپ، سەرۆکی ئەمریکا. ئەمڕۆ وەزارەتی گەنجینەی ئەو وڵاتە بەفەرمی بڕیاری هەڵگرتنی سزاکانی سەر دیمەشقی خستە بواری جێبەجێکردنەوە. ئەمەش یەکەم سەردانی بەرپرسێکی ئیدارەی ئەمریکایە کە سەردانی سووریا دەکات.

زانیاریی بەدەستهاتوو: بەگوێرەی میدیای سووریا، بڕیارە ئەم هەفتەیە تۆم باراک، نێردەی تایبەتی دۆناڵد ترەمپ، سەرۆکی ئەمریکا بۆ سووریا، سەردانی سووریا بکات و لە میانی سەردانەکەیدا لەگەڵ ئەحمەد شەرع، سەرۆککۆماری سووریا و ئەسعەد شەیبانی، وەزیری دەرەوەی ئەو وڵاتە کۆببێتەوە.

ئەوەی پێویستە بیزانیت: پێش سەردانەکەی بۆ سووریا، ڕۆژی 23ـی ئایاری 2025، تۆم باراک، نێردەی تایبەتی دۆناڵد ترەمپ، سەرۆکی ئەمریکا بۆ سووریا لە تۆڕی ئێکس ڕایگەیاند، هەڵگرتنی سزا ئابوورییەکانی سەر سووریا لەلایەن سەرۆکی ئەمەریکاوە، دەبێتە هۆی تێکشکاندنی ڕێکخراوی داعش بەتایبەتی لەو وڵاتە.

ئەمەش بزانە: سێشەممە، 13ـی ئایاری 2025، دۆناڵد ترەمپ، سەرۆکی ئەمریکا لە گوتارێکدا ڕایگەیاند، لەسەر داوای محەممەد بن سەلمان، جێنشنینی سعوودییە، بڕیاری داوە هەموو سزاکانی سەر سووریا هەڵبگرێت.