بە درۆن هێرشکرایە سەر هێلیکۆپتەرەکەی پووتین

ئاڤا نیوز

 

فەرماندەی بەرگریی ئاسمانیی ڕووسیا ئاشکرای دەکات لە کاتی سەردانەکەی پووتین بۆ هەرێمی کورسک، هێلیکۆپتەرەکەی ڕووبەڕووی هێرشی درۆنیی ئۆکراینا بووەتەوە، بەڵام تەواوی هێرشەکان تێکشکێنراون.

 

ڕاگەیێنراوی فەرمی: یوری داشکین، فەرماندەی بەرگریی ئاسمانیی ڕووسیا ڕاگەیاند، ڤلادیمیر پووتین، سەرۆکی ڕووسیا لەنێوان ڕۆژانی 20 و 22ـی مانگی 5ـی ئەمساڵ لەکاتی سەردانێکیدا بۆ هەرێمی کورسک بە درۆن هێرش کراوەتە سەر هێلیکۆپتەرەکەی لەلایەن هێزەکانی ئۆکرایناوە. بەڵام سیستمی بەرگریی ئاسمانیی ڕووسیا توانیویەتی هێرشەکە تێکبشکێنێت و پووتین بە سەلامەت لەو هەوڵە ڕزگاری بووە.

 

فەرماندەی بەرگریی ئاسمانیی ڕووسیا دەشڵێت، لە هێرشەکەدا نزیکەی هەزار و 177 درۆنی ئۆکراینا لەلایەن سیستمی بەرگریی ڕووسیاوە تێکشکێنراوە."

 

ئەوەی پێویستە بیزانیت: پێش سەردانەکەی پووتین بە چەند ڕۆژێک، سوپای ڕوسیا دوای شەڕ و و پێکدادانی قورسی چەند ڕۆژە، توانیبووی هەرێمی کورسک کۆنترۆڵ بکاتەوە.

 

زانیاریی زیاتر: ئەم پێشهاتە لە کاتێکدایە، بە پێچەوانەی ڤۆلۆدێمێر زێلێنسکی سەرۆکی ئۆکراینا، پووتین هەوڵی داوە خۆی لە سەردانیکردنی ناوچە جەنگییەکان بەدوور بگرێت.

 

باکگراوند: لە ئابی 2024ـەوە سوپای ئۆکراینا دەستی بەسەر بەشێک لە هەرێمی کورسکی ڕووسیادا گرتبوو، بەڵام لە کۆتایی مانگی نیسانی ئەمساڵدا، مۆسکۆ توانی هەرێمەکە لە سوپای ئۆکراینا پاکبکاتەوە.