زیاتر لە 35 هەزار پێشمەرگەی یەکەکانی 70 و 80 زەوی وەردەگرن

ئاڤا نیوز

وردبینی لە فۆڕمی یەکەکانی 70 و 80 بەردەوامە، وردبینی بەشێکیان تەواوبووە ڕەوانەی ئەنجوومەنی وەزیران کراون، بڕیارە لەم هەفتەیە ڕەزامەندیان لەسەر بدرێت و ناوەکانیان بگەڕێنرێتەوە وەزارەتی شارەوانی.

وێنە گەورەکە: یەکەکانی 70 و 80 بەشێک بوون لەو توێژانەی بەپێی ڕێنماییەکان، پڕۆسەی دابەشکردنی زەوی نایانگرێتەوە، بەڵام خراونەتە چوارچێوەی وەزارەتی پێشمەرگە و  وەزارەتی شارەوانی کار لەسەر ئەوە دەکات زەوییان بۆ دابین بکات.

لێدوانی فەرمی: سەربەست مەولوود، سەرپەرشتیاری تیمی وردبینی پڕۆسەی دابەشکردنی زەوی له‌ وه‌زاره‌تی شاره‌وانی گوتی، "وردبینی لە نزیکەی 7 هەزار پێشمەرگەی یەکەکانی 70 و 80 تەواوبووە و ڕەوانەی ئەنجوومەنی وەزیران کراون بۆ ڕەزامەندی، نزیکەی سێ هەزار و 200 کەسیان یەکەی 80 و نزیکەی چوار هەزاریان یەکەی 70 ـن."

زانیاریی زیاتر: لە ئێستادا وردبینی لە نزیکەی 30 هەزار پێشمەرگەی ئەو دوو یەکەیە دەکرێت، دوای تەواوبوونی پڕۆسەکە و وەرگرتنی ڕەزامەندی بە قۆناغ دەگەڕێنرێنەوە شارەوانییەکان بۆ ئەوەی زەوییان بۆ دابین بکرێت.