سەرەتای هەفتەی داهاتوو پڕۆسەی وەرگرتنی گەنم لە سایلۆی مەخموور دەستپێدەکات

ئاڤا نیوز

وا بڕیارە سەرەتای هەفتەی داهاتوو، سایلۆی مەخموور دەست بە وەرگرتنی گەنمی جووتیارانی سنوورەکە بکات، بۆ ئەم مەبەستە کشتوکاڵی مەخموور ئامادەکاری دەستپێکردووە.

وێنە گەورەکە: بەهۆی بە پیتی خاکەکەی و ڕێژەی زۆری بەرهەمهێنانی گەنم لە سنوورەکە، قەزای مەخموور بە سەبەتەی نانی عێراق ناودەبرێت و ساڵانە ڕێژەی گەنمی لە زۆربەی ناوچەکانی عێراق زیاترە.

لێدوانی فەرمی: مەروان حەسەن، بەڕێوەبەری کشتوکاڵی مەخموور بە ئاڤا میدیای وت، ئەمساڵ بەهۆی نەبوونی پلانی کشتوکاڵی ناوی جووتیارەکانمان نارد بۆ وەزارەتی بازرگانی لە بەغدا کاتێک گەڕایەوە پشتگیری بۆ جووتیاران دەکەین و پڕۆسەکە دەستپێدەکات، ئەگەرچی هێشتا کاتێکی دیاریکراو نییە بۆ وەرگرتنی گەنمی جووتیاران، بەڵام یان کۆتایی ئەم هەفتەیە یان بە ئەگەری زۆرەوە سەرەتای هەفتەی داهاتوو وەرگرتنی گەنمی جووتیاران لە سایلۆی مەخموور دەستپێدەکات.

زانیاریی زیاتر: مەروان حەسەن ئەوەش دەڵێت: بە قەزای مەخموور و ناحیەکانی وەک دیبەگە، گوێڕ، مەلا قەرە و قەراج، 220 هەزار دۆنم زەوی بە گەنم داچێنراوە و چاوەڕێ دەکرێت تا نزیکەی 130 هەزار تۆن گەنم بەرهەمی جووتیاران بێت.