قەبارەی ئاڵوگۆری بازرگانی عێراق و تورکیا ئاشکرا دەکرێت

ئاڤا نیوز

 

کونسوڵی گشتیی تورکیا لە هەرێمی کوردستان لە بارەی قەبارەی ئاڵوگۆری نێوان عێراق و تورکیا ڕایگەیاند، وەبەرهێنانی کۆمپانیا تورکییەکان لە عێراق نزیکەی 35 ملیار دۆلارە.

 

زانیاریی بەدەستهاتوو: ڕۆژی سێشەممە 27-5-2025،  کونسوڵی گشتیی تورکیا لە هەرێمی کوردستان لەکۆنگرەیەکی ڕۆژنامەوانیدا ڕایگەیاند: قەبارەی ئاڵوگۆڕی بازرگانی لەگەڵ عێراق لە ساڵی  2024 دا 18 ملیار دۆلاری تێپەڕاندووە.

 

لێدوانی فەرمی: ئارمان تۆپجو، کونسوڵی گشتیی تورکیا لە هەرێمی کوردستان ڕایگەیاند: وەبەرهێنانی کۆمپانیا تورکییەکان لە عێراق نزیکەی (35) ملیار دۆلارە، ئاماژەی بەوەشکرد بەردەوامی هاوردەکردنی کاڵای تورکی بۆ هەرێمی کوردستان و عێراق سەرکەوتنێکی گەورەیە و کۆمپانیا تورکییەکان ڕۆڵێکی کارایان لە هەرێمی کوردستاندا هەیە.

 

زانیاریی زیاتر: قەبارەی بازرگانی نێوان هەرێمی کوردستان و تورکیا لە ساڵی 2024 بە شێوەیەکی بەرچاو  گەشەی کردووە، لە هەرێمی کوردستان هەزار و 612 کۆمپانیای تورکی بە شێوەیەکی فەرمی کاردەکەن، ئەمەش نیشانەی پەیوەندییەکی بەهێز و گەشەی بازرگانی نێوان هەردوو لایە.