بانکێک دابەشکردنی فۆرم لە هەژماری من ڕادەگرێت و بانکێکیش سنوورداری دەکات

ئاڤا نیوز

بانكی جیهان بەهۆی زۆریی ژمارەی بەشداربووانەوە لە پرۆژەی هەژماری من، ناتوانێت هیچ کەسێکی دیکە وەربگرێت. بانکی تی بی ئایش تەنیا لە سەنتەری شارەکان بەشداربوو وەردەگرێت.

وێنە گەورەکە: پرۆسەی "هەژماری من" لە کابینەی نۆیەمی حکومەتی هەرێمی کوردستان دەستیپێکرد و تاوەکو ئێستا زیاتر لە 800 هەزار مووچەخۆر لەو پرۆسەیە ناویان تۆمار کراوە و نزیکەی 200 هەزار مووچەخۆری دیکە هێشتان ناویان تۆمار نەکراوە. کۆتایی ئەم مانگە بۆ مووچەخۆرانی هەولێر و دهۆک دوا وادەیە و بۆ مووچەخۆرانی سنووری سلێمانی  و هەڵەبجەش تا کۆتایی ساڵ دوا وادە دەبێت و پێویستە ناویان لە هەژماری من تۆمار بکەن، ئەگەرنا مووچەکانیان ڕادەگیرێت تا ئەو کاتەی ناویان تۆمار دەکەن.

لێدوانی فەرمی: سەرچاوەیەك لە پڕۆژەی هەژماری من بە ئاڤا میدیای ڕاگەیاند، بە هۆی زۆریی بەشداربووانییەوە، بانكی جیهان ناتوانێت مووچەخۆری دیكە  بۆ پڕۆژەی هەژماری من وەربگرێت.

لەلایەکی دیکەوە: بانكی تی بی ئایش تەنیا دەتوانێت لەناو شارەكان بەشداربوو وەربگرێت.

- بەرپرسانی بانكەكە دەڵێن، لە توانایاندا نییە ئەی تی ئێم (ئامێرەکانی) ڕاکێشانی پارە لە دەرەوەی شارەكان دابنێن، هەر بۆیە لە دەرەوەی شارەكان هیچ بەشداربووەك وەرناگرن.

ئەوەی پێویستە بیزانیت: ئێستا لە فۆرمەكانی ناوشار ناوی بانكی تی بی ئای وەك بژاردە هەیە، بەڵام لە دەرەوەی شارەکان نییە. بانكی جیهانیش لە هیچ فۆرمێك ناوەكەی نامێنێت و هیچ كەسێكی دیكە وەرناگرێت.

زانیاریی تایبەت: ئاڤا نموونەی فۆرمێکی دەستکەوتووە كە مووچەخۆران بۆ بەشداربوون لە هەژماری من پڕی دەكەنەوە. بەپێی فۆرمەکە ئێستا ناوتۆماركردن لەم بانكانە بەردەستە:

ئاڕ تی بانک، بانکی بی بی ئەی سی - بانكی ئیسلامیی عێراق، بانكی بەغداد، بانكی ئێن بی ئای، بانكی گەشەپێدانی نێودەوڵەتی، بانكی تی بی ئایش كە گوتمان تەنیا لە فۆرمی ناوشاردایە.