نەتەوە یەکگرتووەکان بارەگاکانی ڕادەستی عێراق دەکاتەوە

ئاڤا نیوز

حکومەتی عێراق ڕایگەیاند، لە چوارچێوەی کۆتاییهاتنی ئەرکەکانی نێردەی نەتەوە یەکگرتووەکان بۆ عێراق (یونامی)، بارەگای نوێنەرایەتیی نەتەوە یەکگرتووەکان لە پارێزگای نەینەوا ڕادەستی حکومەت کرایەوە.

ئەوەی پێویستە بیزانیت: بەگوێرەی بڕیاری ئەنجوومەنی ئاساییشی نەتەوە یەکگرتووەکان، ئەرکی تیمی نەتەوە یەکگرتووەکان بۆ یارمەتیدانی عێراق (یونامی) لەکۆتایی ئەمساڵدا تەواودەبێت و هەموو کارەکانی یونامی ڕادەگیرێن.

لێدوانی فەرمی: باسم عەوادی، وتەبێژی حکومەتی عێراق لە ڕاگەیێنراوێکدا ئاماژەی بەوەکرد، ڕۆژی سێشەممە حکومەت بارەگای نوێنەرایەتیی نەتەوە یەکگرتووەکان (یونامی) لە پارێزگای نەینەوای وەرگرتەوە، بڕیارە لە قۆناغی داهاتووشدا سەرجەم بارەگاکانی دیکەی یونامی وەربگرنەوە.

حکومەتی عێراق جەختیش دەکاتەوە کە سەرەڕای کۆتاییهاتنی یونامی، بەڵام هەماهەنگیی و کاریی پێکەوەیی لەگەڵ ئاژانسەکانی سەر بە نەتەوە یەکگرتووەکان بەردەوام دەبێت کە ئێستا لە وڵاتدا کاردەکەن.