ئیسرائیل فڕۆکەخانەی سەنعای کردە ئامانج

ئاڤا نیوز

ڕۆژی چوارشەممە، فڕۆکە جەنگییەکانی ئیسرائیل هێرشێکی ئاسمانیان بۆ سەر فڕۆکەخانەی نێودەوڵەتیی سەنعا لە یەمەن ئەنجامدا.

 

چیرۆکی سەرەکی: ڕۆژی چوارشەممە 28-5-2025، بەمەبەستی تێکدانی ژێرخانی سەربازی و لە وەڵامی ئەو هێرشانەی گرووپی حووسییەکان دەیکەنە سەر فڕۆکەخانەی بن گوریۆن لە تەلئەڤیڤ، سوپای ئیسرائیل هێرشێکی ئاسمانیی بەرفراوانی کردە سەر فڕۆکەخانەی نێودەوڵەتیی سەنعا لە یەمەن.

 

ڕاگەیێنراوی فەرمی: ئیسرائیل کاتز، وەزیری بەرگریی ئیسرائیل ڕایگەیاند: "هێرشکردنە سەر فڕۆکەخانەی سەنعا پەیامێکی ڕوونە بۆ هەر لایەنێک کە بیەوێت هێرش بکاتە سەر بەرژەوەندییەکانی ئیسرائیل". گوتیشی، ئەو لایەنانە بە هێرشکردنە سەر تەلئەڤیڤ باجێکی قورس دەدەن.

 

کاتز گوتیشی، فڕۆکە جەنگییەکانی ئیسرائیل دوایین فڕۆکەی بێفڕۆکەوان کە  حووسییەکان بۆ هێرشکردن بەکاریان دەهێنا، لەناوبرد. هاوکات دووپاتیکردەوە، حووسییەکانی یەمەن لە ژێر گەمارۆی  ئاسمانی و دەریایی ئیسرائیل دەبن.

باکگراوند: لە سەرەتای دەستپێکردنی هێرشەکانی ئیسرائیل بۆ سەر کەرتی غەززە، حووسیەکانی یەمەن کە لەلایەن ئێرانەوە پاڵپشتی دەکرێن، بەردەوام هێرشی ئاسمانی دەکەنە سەر ئیسرائیل و کەشتییە بازرگانییەکان لە دەریای سوور دەکەنە ئامانج.