شاندی دەم پارتی لەگەڵ  ئاکپارتی کۆدەبێتەوە

ئاڤا نیوز

بۆ تاوتوێکردنی پرۆسەی ئاشتی لە تورکیا شاندی پارتی یەکسانی و دیموکراسیی گەلان 'دەم پارتی' سەردانی  پارتی داد و گەشەپێدان 'ئاکپارتی' دەکات.

وێنەگەورەکە: ڕۆژی چوارشەممە 28-05-2025، شاندی دەم پارتی و ئاکپارتی لە پەرلەمانی تورکیا کۆدەبنەوە، پێشبینی دەکرێت لە کۆبوونەوەکەدا قۆناغی دوای بڕیاری چەکدانان و خۆهەڵوەشاندنەوەی  پارتی کرێکارانی کوردستان و دوایین پێشهاتەکانی پرۆسەی ئاشتی لە تورکیا گفتوگۆی لەسەر بکرێت.

زانیاریی بەدەستهاتوو: بەپێی میدیاکانی تورکیا شاندی دەم پارتی پێکدێن لە  تولای هاتیمئۆغوڵڵاری و تونجەر باکرهان، هاوسەرۆکانی دەم پارتی و کۆبوونەوەکەیان لە کاتژمێر 3:00 دوای نیوەڕۆ دەستپێدەکات.

ئەوەی پێویستە بیزانیت: بڕیارە شاندی دەم پارتی دوای بڕیاری  چەکدانان و خۆهەڵوەشاندنەوەی پەکەکە، بۆ تاوتوێکردنی قۆناغی دوای ئەم بڕیارە سەردانی پارتە سیاسییەکانی تورکیا بکەن، دوێنێش هەر لە چوارچێوەی ئەو پرسە سەردانی مەهەپەیان کرد و دەرەنجامی کۆبوونەوەکەیان بە ئەرێنی وەسف کرد.