ژمارە 'یەک' شەڕێکی گەورە لە نێوان سەرکردە باڵاکانی عێراق هەڵدەگیرسێنێت

ئاڤا نیوز

زۆرێک لە سەرکردەی لایەنە سیاسییەکانی عێراق سەرۆکایەتیی لیستەکانیان لەپارێزگای بەغدا دەکەن و بە ژمارە یەک بەشداری لەهەڵبژاردنی داهاتووی پەرلەمانی عێراق دەکەن .

چیرۆکی سەرەکی: هەر یەکە لە نووری مالیکی، سەرۆکی هاوپەیمانی دەوڵەتی یاسا، محەممەد شیاع سوودانی، سەرۆکی بزووتنەوەی فوراتەین، هادی عامری، سەرۆکی ڕێکخراوی بەدر، محەممەد حەلبووسی، سەرۆکی پارتی تەقەدوم، موحسین مەندەلاوی، سەرۆکی هاوپەیمانی ئەساسی نیشتمانی، و ژمارەیەک سەرکردەی دیکە سەرۆکایەتی لیستەکانیان بەژمارە یەک لەپارێزگای بەغدا دەکەن.

لێدوانی فەرمی: عائید هیلالی، ڕاوێژکاری سەرۆکوەزیرانی عێراق بەئاڤا میدیای ڕاگەیاند: بەشداریکردنی ئەو ژمارە زۆرە لەسەرکردەی لایەنە سیاسییەکان لەهەڵبژاردنی داهاتووی پەرلەمانی عێراق و سەرکردایەتی کردنی لیستەکانیان بەژمارە یەک لەبەغدای پایتەخت، دەرفەتی بەدەستهێنانی دەنگی زۆر لەنێو خودی لیستەکان کەمدەکاتەوە و زۆربەی کاندیدەکان بەدەنگی ئەوان گەمەکە دەبەنەوە و دەچنە پەرلەمان ، چونکە ئەوان زۆربەی دەنگەکانی بەغدا بۆخۆیان مسۆگەر دەکەن.

لەلایەکی دیکەوە: موجاشیع تەمیمی، توێژەری سیاسی نزیک لەڕەوتەکەی موقتەدا سەدر بەئاڤا میدیای گوت، "بەشداریکردنی ئەو سەرکردانە لەبەغدا پەیامێکی ڕوونە کە بڕیاری سیاسیی داهاتوو لە بەغدای پایتەختدا دادەڕێژرێت نەوەک لە سنووری ناوچەیی".

ئەوەی پێویستە بیزانیت: بڕیارە 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکانیش لە ئامادەکارییەکانی بەردەوامە و لە ڕۆژی یەکشەممە 25-5-2025 ـەوە دەستی بە وەرگرتنی لیستی کاندیدان "لیستی کراوە و تاک" کردووە.