فایلی خەڵک؛ بەشێک لە گەڕەکەکانی ڕانیە و دەوروبەری ڕووبەڕووی کەمئاوی بوونەتەوە

ئاڤا نیوز

نزیکەی 300 ماڵی سنووری ئیدارەی ڕاپەڕین بەهۆی نەبوونی تۆڕی دابەشکردنی ئاوی خواردنەوە هەفتانە جارێک بەتەنکەر ئاویان پێدەدرێت.

چیرۆکی سەرەکی: هەریەکە لە گەڕەکەکانی هەنجیرەو تیتۆکە و بۆسکێن و کۆمەڵگای شکارتە لەسنووری ڕانیە و گەرەکی نەمروود لەحاجیاوا کە هەموویان سەربە ئیدارەی راپەڕینن، تائێستا ئاویان بەبۆری بۆ ڕانەکێشراوە بەناچاری هەفتەی جارێک بەتانکەر ئاویان بۆ دەچێت.

لێدوانی فەرمی: یەکێک لە دانیشتووانی ئەو گەڕەکانە بە ئاڤا میدیای ڕاگەیاند: ئێمە نزیکەی 20 ساڵە ماڵمان هێناوەتەوە گەڕەکی هەنجیرە لەڕانیە، لەوکاتەوە تا ئێستا هەر بە تانکەر ئاومان بۆدێت و دەبێت ئەو ڕۆژە لەبەیانی زووەوە بەدیار هاتنی تانکەرەکان دابنیشین تاوەکو بێ ئاو نەبین، ئەمەش دادمان نادات ئینجا خۆشمان بەپارە ئاو دەکڕین تاوەکوو بەشمان دەکات.

بۆچوونی لایەنی بەرامبەر: سەلام عومەر، بەڕێوبەری ئاوی ڕاپەڕین،  بە ئاڤا میدیای ڕاگەیاند "بەهۆی ئەوەی ڕۆژ بەڕۆژ خانووی نوێ دروست دەکرێن یان بەشێک لەو گەڕەک وکۆڵانانە دەکەونە دەرەوەی سنووری ماستەر پلانی شارەوانیەوە، نەیانتوانیوە تۆڕی ئاوی خواردنەوەیان بۆ ڕابکێشن، بۆگەڕەکی هەنجیرەش کە پێشووتر گوند بووە خراوەتە سەر نەخشەی شارەوانی ڕانیە، بڕیارە لەماوەیەکی نزیکدا تۆڕی ئاوی خورادنەوە بە 50 ماڵی نوێی بگەیەنن.