لە مانگێکدا کارەبای 24 کاتژمێری بۆ 500 هەزار کەس دابین دەکرێت

ئاڤا نیوز

 

ژمارەی سوودمەندبووان لە پرۆژەی ڕووناکیی کارەبای 24 کاتژمێری، گەیشتە یەک ملیۆن و 100 هەزار کەس، تەنیا ئەم مانگەش کارەبای 24 کاتژمێری بۆ 500 هەزار کەس دابین کراوە.

وێنە گەورەکە: پڕۆژەی ڕووناکی بۆ دابینکردنی کارەبای 24 کاتژمێری ڕۆژ لەدوای ڕۆژ فراوانبوون دایە، ئێستا لە سەنتەری شارەکانی هەولێر و سلێمانی و دهۆک کاری لەسەر دەکرێت، پلانیش وایە تا کۆتایی ساڵی 2026 بگاتە سەرتاسەری هەرێمی کوردستان.

 

لێدوانی تایبەت: تیمی پرۆژەی ڕووناکی تایبەت بە ئاڤایان ڕاگەیاند، مانگی ڕابردوو کارەبای 24 کاتژمێری لە نزیکەی 55 گەڕەک بۆ 600 هەزار کەس دابین کرابوو، ئەم مانگە کارەبای 500 هەزار کەسی دیکە لە 45 گەڕەکی تر کراوەتە 24 کاتژمێری، ئێستا لە هەرسێ شاری هەولێر و سلێمانی و دهۆک، کارەبای ملیۆنێک و 100 هەزار کەس لە نزیکەی 100 گەڕەک 24 کاتژمێرییە. ئەمە لەکاتێکدایە بەپێی سەرژمێری ساڵی ڕابردوو دانیشتووانی هەرێمی کوردستان 6 ملیۆن و 370 هەزار کەسە.

ئەمەش بزانە: تێکڕای هاوبەشانی کارەبا لە هەرێمی کوردستان ملیۆنێک و 885 هەزارو 270 هاوبەشە، تاوەکو ئێستا کارەبای 24 کاتژمێری بە  220 هەزار هاوبەش گەیێنراوە.

بۆچی گرنگە: پرۆژەی ڕووناکی جگە لەوەی کارەبای 24 کاتژمێری بۆ هاووڵاتییان دابین دەکات، لە ڕووی ژینگەیی و تەندروستیشەوە چەندین قازانج و سوودی گشتی هەیە، هەروەها خەرجییەکەی بۆ زۆرینەی خەڵک کەمترە لەو پارەیەی کە هاووڵاتییان بە مۆلیدەی ئەهلی و پارەی کارەبای نیشتمانی پێکەوە، دەیدەن.