دەشتی بەهەشت دەستپێدەكاتەوە و زیانلێكەوتووانی پرۆژەكەش قەرەبوو دەكرێنەوە

ئاڤا نیوز

بەڕێوەبەری گشتیی وەبەرهێنانی هەولێر، تایبەت بە ئاڤا ڕایدەگەیەنێت، چارەسەریی پێویست بۆ پرۆژەی دەشتی بەهەشت دانراوە و لە ئاییندەیەكی نزیكدا ئەو هاووڵاتیانەی لە پرۆژەكە زەرەرمەند بوون، قەرەبوو دەكرێنەوە.

چیرۆكی سەرەكی: دوو مانگ لەمەوبەر، سەرۆكوەزیران مەسرور بارزانی، بڕیاری دا مۆڵەتی پرۆژەی دەشتی بەهەشت سەرلەنوێ بە وەبەرهێنەرانی نوێ بدرێتەوە، بۆ ئەم مەبەستەش دەستەی وەبەرهێنان لەژێر ڕاسپاردەی سەرۆكی حكومەتی هەرێمی كوردستان، لەگەڵ ژمارەیەك وەبەرهێنەر لەگفتوگۆدایە بۆ وەرگرتنی پرۆژەكە و تەواوكردنی كارەكانی، هاوكات لیژنەیەكی هونەری و تەكنیكیش پێكهێنراوە، بەمەبەستی پێداچوونەوە بە گرێبەستەكان و خەملاندنی زیانەكان و قەرەبووكردنەوەی زیانلێكەوتووانی پرۆژەكە.

لێدوانی فەرمی: سامان عارەب، بەڕێوەبەری گشتیی وەبەرهێنانی هەولێر، تایبەت بە ئاڤا ڕایگەیاند، ڕێکكاری یاسایی پێویست بەرامبەر وەبەرهێنەری كەمتەرخەمی پێشووی پرۆژەكە گیراوەتەوە بەر، هەموو ئەوانەشی شووقە و ڤێلاكانیان كڕیوە، ئەگەر سەلمێنرا خاوەنی شەرعی پرۆژەكەن، لە هەمان پرۆژە یاخود لە پرۆژەیەكی دیكەی هاوشێوە كە هەمان بەهای هەبێت، قەرەبوو دەكرێنەوە.

باكگراوند: ساڵی 2010 مۆڵەت درایە كۆمپانیای جێبەجێكاری پرۆژەی (دەشتی بەهەشت) كە دەبووایە لە سێ ساڵدا پرۆژەكە تەواو بكات كە خۆی لە 427 ڤێلا و 1221 شوقە دەبینێتەوە، بەڵام وەبەرهێنەرەکەی  کە خاوەنی گرووپی كۆمپانیاكانی عادل موتەحیدە بوو، كاره‌كانی پرۆژەكەی تەواو نەكرد و هەڵهات.