سەرۆكوەزیران بارزانی: دەبێت قوربانیانی دەستی داعش قەرەبوو بكرێنەوە

ئاڤا نیوز

سەرۆكوەزیران بارزانی، دووپاتی دەكاتەوە پێویستە تاوانبارانی داعش لەسەر تاوانەكانیان دادگایی بكرێن و قوربانیانیش قەرەبوو بكرێنەوە، ڕاوێژكاری تایبەتی سكرتێری گشتی نەتەوەیەكگرتووەكانیش پێزانینی خۆی دەردەبڕێت بۆ حكومەتی هەرێمی كوردستان.

ڕاگەیێنراوی فەرمی: ئەمڕۆ دووشەممە 3/18 سەرۆكوەزیران بارزانی، پێشوازی لە كریستیان ریتچەر، ڕاوێژكاری تایبەتی سكرتێری گشتی نەتەوە یەكگرتووەكان و سەرۆكی تیمی ڵێكۆڵینەوەی نێودەوڵەتیی لە تاوانەكانی داعش (یونیتاد UNITAD) كرد بەبۆنەی كۆتاییهاتنی ئەركەكەی.

ئەوەی پێویستە بیزانیت: سەرۆكی تیمی یونیتاد ، سوپاس و پێزانینی خۆی و تیمەكەی بۆ هەماهەنگیی و هاوكاریكردنی دامەزراوەكانی حكومەتی هەرێمی كوردستان لەگەڵ تیمی یونیتاد دەربڕی، لە سەرخستنی كارەكانی تیمەكە لەبواری كۆكردنەوە و ئەرشیڤكردن و بەدیجیتەڵكردنی بەڵگەكانی تاوانەكانی تیرۆریستانی داعش و كاركردن بۆ دادگاییكردنیان لەسەر تاوانەكانیان.

بۆچی گرنگە: سەرۆكوەزیران بارزانی، جەختی لە گرنگیی پاراستنی مافی قوربانییانی دەستی تیرۆریستانی دەستی داعش و قەرەبوو كردنەوەیان و بەردەوامبوونی پاڵپشتی نێودەوڵەتی بۆ دادگاییكردنی تاوانبارانی داعش كردەوە.

بابەتی ستراتیژی: سەرۆكوەزیران بارزانی، دووپاتی كردەوە پێویستە تاوانبارانی داعش، لەسەر تاوانەكانیان كە تاوانی كۆمەڵكوژی و تاوانی جەنگ و تاوانی دژە مرۆڤایەتین دادگایی بكرێن و بۆ ئەم مەبەستەش  حكومەتی هەرێمی كوردستان، بەردەوام دەبێت لە درێژەدان بە هاریكاری و هەماهەنگیكردن لەگەڵ كۆمەڵگەی نێودەوڵەتی.