پەرلەمانتارێکی عەسائیب هێرشی تووند دەکاتە سەر سەرۆکی دەستەی حەشدی شەعبی

ئاڤا نیوز

پەرلەمانتارێکی بزووتنەوەی سادقون-ـی سەر بە عەسائیب هێرش دەکاتە سەر سەرۆکی دەستەی حەشدی شەعبی و ئاماژە بەوە دەکات، بوونی ئەو لە دەستەکە، پەڵەیەکی ڕەشە و پێویستە بە زووترین کات لەو پۆستە لاببرێت.

 

وێنە گەورەکە: بڕیارە لە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، لە ئێستاوە لایەنە ناکۆکەکان دەستیان بە هێرشکردنە سەر یەک و تۆمەتبارکردنی یەکتر لە چوارچێوەی بانگەشەی پێشوەختەی هەڵبژاردن، دەستپێکردووە.

 

پەیامی فەرمی: ئەحمەد موسەوی، ئەندامی پەرلەمانی عێراق لە فراکسیۆنی "سادقون" لە پەیامێکدا هێرشی تووند دەکاتە سەر فالح فەیاز، سەرۆکی دەستەی حەشدی شەعبی و کۆمەڵێک تۆمەتی دەخاتە پاڵ، لەوانە: "دامەزراندنی 1500 ئەندامی حەشدی شەعبی پاش ڕاهێنان و پڕچەککردنیان لەلایەن تورکیا".

 

لەهەمان کاتدا: ئەو پەرلەمانتارە، سەرۆکی دەستەکە بە "دامەزراندنی کەسانی دیکە لە دەستەکە بۆ پشتیووانیکردن لە کاندیدەکانی سەر بە خۆی" تۆمەتبار دەکات و ئاماژە بۆ ئەوەش دەکات "بوونی ئەو (فالح فەیاز) لە حەشدی شەعبی پەڵەیەکی ڕەشە و دەبێت بە زووترین کات لاببرێت".

 

ئەوەی پێویستە بیزانیت: بۆ هەڵبژاردنی داهاتوو، فالح فەیاز، سەرۆکی دەستەی حەشدی شەعبی، لە چوارچێوەی هاوپەیمانیێتی ئاوەدانکردنەوە و گەشەپێدان لەگەڵ محەممەد شیاع سوودانی، سەرۆکوەزیرانی عێراق و ئەیاد عەللاوی، سەرۆکی هاوپەیمانیی وەتەنی و ژمارەیەک سەرکردەی دیکە بەشدارە.