شاندێكی ئیسرائیل بۆ وەڵامی ئاگربەستی غەززە لە قەتەرە

ئاڤا نیوز

شاندێكی ئیسرائیل بە سەرۆکایەتیی دەیڤید بارنیا، بەڕێوەبەری دەزگای هەواڵگریی ئیسرائیل، ئەمڕۆ چوونە دەوحە بۆ گەیاندنی وەڵامی تەلئەڤیڤ بۆ پێشنیازی حەماس بۆ ئاگربەست.

زانیاریی بەدەستهاتوو: بە گوێرەی هەواڵێکی کەناڵ 12ی ئیسرائیلی، شاندی دەزگای هەواڵگری ئیسرائیل بەرەو قەتەر چوون بۆ ئەوەی دانووستانی ناڕاستەوخۆ لەگەڵ حەماس بکەن و وەڵامی پێشنیازەکەیان بدەنەوە.

بۆچی گرنگە: گەر لەم دانیشتنەدا حەماس و مۆساد ڕێبککەون، لە مانگی ڕەمەزاندا شەڕ لە غەززە دەوەستێت. 

ئەوەی پێویستە بیزانیت: حەماس دوای کۆبوونەوەکانی لەگەڵ میسر و قەتەر لە قاهیرە لە 14ی ئادار، پێشنیازێكی نوێی بۆ ئاگربەست و ئاڵوگۆڕی دیلەکان لە غەززە پێشکەش کرد. بنیامین نەتانیاهۆ، سەرۆکوەزیرانی ئیسرائیل، داواکارییەکانی ناو پێشنیازی حەماسی بە ناعەقڵانی وەسف کرد.

لە لایەکی دیکەوە:  بەرپرسێکی ئیسرائیلی ڕایگەیاندووە: دانووستانەکان درێژخایەن و سەخت دەبن، لەبەر ئەوەی کابینەی ئەمنی و حکومەتی ئیسرائیل دەسەڵاتی پێویستییان بە تیمی دانووستانکار نەداوە.

باکگراوند: لە 24 تشرینی دووەمی 2023 بۆ ماوەی چوار ڕۆژ ئاگربەست راگەێینرا و دواتر بۆ ماوەی سێ ڕۆژی دیکە درێژکرايەوە، لەكاتی ئاگربەستەكەدا ژمارەیەك بارمتەی فەڵەستین و ئیسرائیل ئازادكران.