140 پڕۆژەیاسا لە چاوەڕوانی کۆبوونەوەی پەرلەماندایە

ئاڤا نیوز

لەپاڵ خشتەی بودجە و پلانی گەشەپێدان، لەئێستادا 140 پڕۆژەیاسا لە چاوەڕوانی کۆبوونەوەی پەرلەمانی عێراقدان تا دەنگیان لەسەر بدرێت، لەم مانگەشەدا کۆبوونەوە نائاساییەکانی پەرلەمان دەستپێدەکەن.

 
وێنە گەورەکە: 26ی ئایار سەرۆکایەتیی پەرلەمانی عێراق ڕایگەیاند، مانگی داهاتوو ژمارەیەک کۆبوونەوەی نائاسایی پەرلەمان ئەنجام دەدرێن، بۆیە داوای لە پەرلەمانتاران کرد خۆیان ئامادە بکەن و ئامادەی دانیشتنەکانیش بن.

 

لێدوانی فەرمی: حوسێن سعبری، ئەندامی لیژنەی گەشەپێدان و وەبەرهێنان لە پەرلەمانی عێراق ڕایگەیاند، زیاتر لە 140 پڕۆژەیاسا لەسەر مێزی پەرلەمانن و زۆرینەشیان لە لیژنەکان ڕێکارەکانیان تەواوکراون، تەنیا ئەوەیان ماوە لە کۆبوونەوەی پەرلەمان گفتوگۆیان لەسەر بکرێت و دەنگیان لەسەر بدرێت.

 

ئەوەی پێویستە بیزانیت: پڕۆژەیاساکانی نەوت و غاز، خزمەتی مەدەنی، دەستبەری کۆمەڵایەتی، هەمواری یاسای خوێندنی باڵا و هاوبەشی لەنێوان کەرتەکانی تایبەت و گشتی لە دیارترین ئەو پڕۆژانەن کە ئێستا لە پەرلەمانن و پێویستییان بە دەنگدانە، بۆچوونێکیش هەیە کە بەهۆی چوونەناو کەشوهەوای هەڵبژاردنەوە، پێناچێت ئەم خولەی پەرلەمان بتوانێت کۆبوونەوە بکات و یاسای نوێ دەربکات.