لەسەر داوای تاڵیبان ڕووسیا ڕێگە بە کردنەوەی باڵیۆزخانەی ئەفغانستان لە مۆسکۆ دەدات

ئاڤا نیوز

لەسەر داوای فەرمی تاڵیبان، ڕووسیا رێگە دەدات بە کردنەوەی باڵیۆزخانەی ئەفغانستان لە مۆسکۆ.

وێنە گەورەکە: لە ساڵی 2021 بزوتنەوەی تاڵیبان  ئەفغانستانی کۆنتڕۆڵ کرد و دەسەڵاتی گرتە دەست، مۆسکۆ سەرەڕای مێژووی پڕ جەنگ و ناکۆکی لەگەڵ تاڵیبان، دڵخۆش بوو بە دۆخی نوێی ئەفغانستان و  بە شکستی ئەمریکا ناوزەندی کرد کە دوای 20 ساڵ مانەوە لە ئەفغانستان ناچار بە دەستبەرداربوونی کران.

لێدوانی فەرمی: ئەمیر خان موتەقی، وەزیری کاروباری دەرەوەی ئەفغانسان لە ڕاگەیێنراوێکی فەرمیدا وەڵامی مۆسکۆی بۆ کردنەوەی باڵیۆزخانەی ئەفغانستان بە گرنگ ناوزەند کرد و ڕایگەیاند، هیوادارین ئەم قۆناغە نوێیە ببێتە هۆکاری هەماهەنگی فراوانی نێوان ئەفغانستان و ڕووسیا لە هەموو بوارەکاندا و بە تایبەت بتوانین پەیوەندییە سیاسی و ئابورییەکان پەرە پێبدەین.

ئەوەی پێویستە بیزانیت: دوای ئەوەی لە ساڵی2021 دەستی بەسەر تەواوی ئەفغانستاندا گرت، هیچ دەوڵەتێک لەو کاتەدا ئامادە نەبوو ڕاستەوخۆ دان بە دەسەڵاتی تاڵیباندا بنێت و ڕێگە بە کردنەوەی باڵیۆزخانەی ئەفغانستان بدات، لە ساڵی 2023 چین یەکەم دەوڵەت بوو ڕێگەی بە کردنەوەی باڵیۆزخانەی ئەفغانستان دا، هەفتەی ڕابردووش پاکستان ڕایگەیاند ئامادەیە ڕێگە بە کردنەوەی نوێنەرایەتی ئەفغانستان لە وڵاتەکەی بدات.