ڕوانگەیەکی ژینگەیی هۆشداری لە ژەهراویبوونی ئاوی شەتولعەرەب دەدات

ئاڤا نیوز

ڕوانگەیەکی ژینگەیی، ئاماژە بە بەرزبوونەوەی ڕێژەی سوێری ئاوی شەتولعەرەب دەکات و هۆشداری لەبارەی ژەهراویبوونی ئاوەکە دەدات و مەترسیی بەرزبوونەوەی ڕێژەکەش لە پارێزگای بەسرە، دوو هێندەیە.

بڵاوکراوەی فەرمی: ڕوانگەی عێراقی سەوز لەسەر زاری شارەزایانی ئەم بوارەوە ڕایگەیاند، ڕێژەی خوێ لە شەتولعەرەبدا بەرزبوونەوەیەکی بێ پێشینەی بەخۆیەوە بینیوە، ڕێژەکە لە قەزای ئەبی خەسیب بە گشتی و ناوچەی سیحان بە تایبەتی 14هەزار (TDS) تۆمارکراوە، ئەمەش واتای ئەوەیە ئەم هاوینە ڕێژەی پیسبوونەکە بەرزبوونەوە بەخۆیەوە دەبینێت.

ئەوەی پێشبینی دەکرێت: پێشبینی دەکرێت ڕێژەی خوێ لە ئاوی شەتولعەرەب و بەدیاریکراوی لە ناوەندی شاری بەسرە بگاتە 30 هەزار (TDS)، کە دەکاتە نیوەی سوێری ئاوی دەریا.

بابەتە ستراتیژییەکان: ڕوانگەی عێراقی سەوز پێیوایە ئەم بابەتە وا لە عێراق دەکات ڕوو بکاتە دانوستاندنی جددی و یەکلاکەرەوە لەگەڵ وڵاتانی دراوسێ و جێبەجێکردنی ئەو بەڵێنە حکومییانەی کە پشتگوێی خستووە سەبارەت بە دروستکردنی بەنداو و وێستگەکانی شیرینکردنی ئاو، هەروەها کۆنترۆڵکردنی زیادەڕۆییەکان لەسەر زێ و  ڕووبارەکان، بەتایبەتی ئەو کۆمپانیایانەی ئاو لە بیرەکان دەکات بۆ دەرهێنانی نەوت و دەستبەسەرداگرتنی بڕێکی زۆر لە ئاو لەلایەن کەسانی خاوەن هەژموون و کۆنترۆڵکردنی بەردانەوەی ئاو.

هۆشدارییەکان: ڕوانگەی عێراقی سەوز هۆشداری لە دووبارە سەرهەڵدانەوەی ژەهراویبوونی ئاو دەکاتەوە بەهۆی پیسکەرە ڕەقەکانەوە لە ماوەی هاوینی ئەمساڵدا، کە زۆر سەخت دەبێت بۆ دانیشتووانی بەسرە ئەگەر هیچ ڕێکارێک لەوبارەیەوە نەگیرێتەبەر.