پێشبینی دەکرێت جەژن زیاتر لە 300 هەزار گەشتیار سەردانی هەرێمی کوردستان بکەن

ئاڤا نیوز

پێشبینی دەکرێت لە ڕۆژانی جەژنی قوربان زیاتر لە 300 هەزار گەشتیار سەردانی هەرێمی کوردستان بکەن، پلانێکی تایبەتیش بۆ پێشوازی لە گەشتیاران ئامادە کراوە.

وێنە گەورەکە:  ساڵانە لە جەژن و بۆنەکان دەیان و سەدان هەزار گەشتیار بەتایبەت لە باشوور و ناوەڕاستی عێراق ڕوو لە هەرێمی کوردستان دەکەن، لایەنە پەیوەندیدارەکان و کەرتی تایبەتیش ئامادەکاری تەواو بۆ پێشوازی لە گەشتیاران دەکەن.

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزار بە ئاڤا میدیای گوت، پێشبینی دەکەین زیاتر لە 300 هەزار گەشتیار ڕوو لە شارەکانی کوردستان بکەن، بۆ ئاسانکاری و پێشوازی لە گەشتیاران ژمارەیەک لیژنە پێکهێنراون و لە ڕۆژانی جەژنیش سەرجەم بنکە گەشتیارییەکان کراوە دەبن، لە بازگەکانیش ئاسانکاری لە هاتنە ناوەوەی گەشتیاران دەکرێت و بەچەند خولەكێک ڕێکارەکانیان بۆ ئەنجام دەدرێت.

زانیاریی زیاتر:  دەستەی گەشتوگوزار هەشت ژمارەی پەیوەندی وەکو هێڵی گەرم دەخاتە کار، بۆ ئەوەی لە هەر ڕووداوێکی نەخوازراو گەشتیار پەیوەندییان پێوە بکات.