پارتی: ئاماژەی ئەرێنی بۆ ناردنی مووچە هەیە

ئاڤا نیوز

 

كۆمیتەی ناوەندیی پارتی دیموكراتی كوردستان سەبارەت بە پرسی مووچە و پێكهێنانی كابینەی دەیەمی حكومەتی هەرێمی كوردستان و چەند پرسێكی دیكە كۆبووەوە و لە ڕاگەیێندراوێكیشدا ناوەڕۆكی كۆبوونەوەكەی ئاشكرا كرد.

 

وێنە گەورەکە: بەپاساوی ئەوەی هەرێمی کوردستان پشکی لە بودجەدا تەواوبووە و داهاتی ناوخۆشی ڕادەستنەکردووە، ڕۆژی 28ـی ئایار تەیف سامی، وەزیری دارایی عێراق واژۆی لەسەر نووسراوێک کردووە و تێیدا ئاماژەی بەوە کردووە، چیتر مووچەی فەرمانبەرانی کوردستان خەرج ناکات، ئەمەش کاردانەوەی ناوخۆی و عێراق لێکەوتەوە و بەشێک لە لایەنەکانیش هەڵوێستیان دژی ئەو بڕیارە وەرگرت. 

چیرۆکی سەرەکی: ئەمڕۆ دووشەممە 2ی حوزەیرانی 2025, کۆمیتەی ناوەندی پارتی دیموکراتی کوردستان بە سەرپەرشتی سەرۆک مەسعود بارزانی کۆبوونەوەی خۆی ئەنجامدا، تەوەری سەرەکی کۆبوونەوەکەش تاوتوێکردنی پرسی ڕاگرتنی مووچەی فەرمانبەرانی کوردستان بوو لەلایەن وەزارەتی دارایی عێراقەوە. 

 

زانیاریی زیاتر: جگە لە تاوتوێکردنی پرسی ڕاگرتنی مووچەی فەرمانبەران، چەند تەوەرێکی دیکەش لە کۆبوونەوەی کۆمیتەی ناوەندی پارتی تاوتوێکران کە پێکهاتووبن لە:-

 

یەکەم - كۆمیتەی ناوەندیی پارتی سەبارەت بە پرسی مووچەی فەرمانبەرانی هەرێمی كوردستان دەڵێت: پەسەندی پاڵپشتى هەڵوێستى مەکتەبى سیاسیمان لە بارەى مووچەى مووچەخۆرانى کوردستان دەكەین، هەروەها هەڵوێستى حیزبە کوردستانییەکان لە کۆبوونەوەى هاوبەشى ڕێکەوتى 31ى ئایارى 2025 بەرز دەنرخێنین، دواى ئەو ئاماژە ئەرێنییەی کە هەیە لەلایەن حکومەتى فیدراڵى و دامەزراوەى قەزائى بۆ چارەسەرکردنى گرفتەکە، ئێمەش داکۆکى دەکەین لە چارەسەرکردنى کێشەکان و کۆتایى هێنان بەم شێوەڕەفتارە نادادپەروەرانەیەى کە لەگەڵ بژێوى ژیانى فەرمانبەر و مووچەخۆرانى کوردستان دەکرێت.

 

دووەم - لە بەشێكی دیكەی ڕاگەیێندراوەكەدا كۆمیتەی ناوەندیی پارتی ئاماژەی بە ئەوە داوە كە حیزبەكە بەردەوامە لە هەوڵی ڕێكخستنەوەی نێوماڵی كوردستان و هەوڵی جدیشی داوە بۆ دروستكردنی هاوپەیمانێتییەكی كوردستانی بۆ بەشداری لە هەڵبژاردنی داهاتووی عێراق بەڵام هیچ ئەنجامێكی نەبووە.

 

سێیەم - كۆمیتەی ناوەندیی پارتی سەردانەكەی سەرۆكوەزیران مەسرور بارزانی، بۆ ویلاتە یەكگرتووەكانی ئەمریكا بە باش دەزانێت و جەخت دەكاتەوە كە كاریگەریی باشی بۆ پتەوکردنی پەیوەندیی نێوان هەرێمی كوردستان و ئەمریكا دەبێت، سەبارەت بە ڕێككەوتنەكانیش باس لەوەکراوە كە سوودی بۆ بووژانەوەی ئابووریی هەرێمی كوردستان و عێراق دەبێت.

چوارەم - لە تەوەرێكی دیكەی کۆبوونەوەکە پرسی پێكهێنانی كابینەی دەیەمی حكومەتی هەرێمی كوردستان بووە، لەمیانەیدا ڕوونكردنەوە سەبارەت بە هەنگاوەكانی پرۆسەكە دراوە و هەمووان هاوڕا و کۆکبوون لەسەر پێكهێنانی كابینەی دەیەم بە زووترین كات.