هێرش دەکرێتە سەر چالاکوانێکی سەڵاحەددین و بۆ چارەسەر ڕەوانەی هەولێر دەکرێت

ئاڤا نیوز

 

بەهۆی کۆمێنتێکی فەیسبووکەوە، چالاکوانێک لە ناحیەی شەرگاتی سەر بە پارێزگای سەڵاحەددین، لەلایەن پاسەوانانی کوڕی ئەندامێکی ئەنجوومەنی نوێنەرانی عێراقەوە هێرش دەکرێتە سەری و بەسەختی بریندار دەکرێت.

 

چیرۆکی سەرەکی: دوای ئەوەی عەلی خەمیس، چالاکوانی مەدەنی، لە تۆڕی کۆمەڵایەتی فەیسبووک کۆمێنتێکی دژی مستەفا میقدام جومەیلی، کوڕی پەرلەمانتار میقدام جومەیلی لە حیزبەکەی حەلبووسی بڵاوکردەوە، تێیدا داوای لە مستەفا کردبوو دەستوەردان لە ئازادکردنی ئامۆزا زیندانیکراوەکەی کە بڕیارە بەیاسای لێبووردنی گشتیی ئازاد بکرێت نەکات، بەرەبەیانی ئەمڕۆ دووشەممە 2-6-2025، هێزێکی چەکدار لە پاسەوانەکانی مستەفا میقدام جومەیلی، هێرش دەکرێتە سەری و بەسەختی بریندار دەکرێت.

 

لێدوانی فەرمی: بنەماڵەی چالاکوان عەلی خەمیس بە ئاڤایان ڕایانگەیاند: پاسەوانانی کوڕی پەرلەمانتار میقدام جومەیلی ڕێگرییان لە ئۆتۆمبێلەکەی عەلی خەمیس کرد و هێرشیان کردە سەری و بە تووندی لێیانداوە، لە ئاکامدا سەری و دەست و بڕبڕەی پشتی شکێنراوە.

 

زانیاریی زیاتر: بنەماڵەی عەلی ئاماژەیان بەوەشکرد، کوڕی ئەو پەرلەمانتارە ڕێگری لە تەندروستیی شەرگات و تکریت کرد چارەسەری  عەلی بکەن، بۆیە باوکی عەلی خێرا کوڕەکەی گواستەوە بۆ پارێزگاری هەولێر و ئێستا لە نەخۆشخانەیەکی شاری هەولێر چارەسەری بۆ دەکرێت.

 

ئەمەش بزانە: لەسەر ڕووداوەکە تاوەکو ئێستا دەزگا ئەمنییەکانی پارێزگای سەڵاحەددین هیچ ڕوونکردنەوەیەکیان نەداوە.