لە زاخۆ 11 هەزار پارچە زەوی ئامادەکراون بۆ دابەشکردن

ئاڤا نیوز

ئیدارەی سەربەخۆی زاخۆ ئامادەسازی بۆ قۆناغی دووەمی دابەشکردنی زەوی بەسەر فەرمانبەران دەکات، زەوی پێویست ئامادەکراون و دوای پەسەندکردنی لەلایەن شارەوانی و ئیدارەی سەربەخۆ دەست بە دابەشکردنیان دەکرێت.
 
وێنە گەورەکە: ئیدارەی سەربەخۆی زاخۆ، لەسەر ئاستی هەرێمی کوردستان یەکەم شوێن بوو دەستی بە دابەشکردنی زەوی کرد، لە قۆناغی یەکەم چوار هەزار و 747 پارچە زەوی دابەشکران، لە ئێستادا سەرجەم نەخشەکان تەواوکراون، بەشی هەموو سوودمەندبووانی سنوورەکە زەوی دابین کراوە.
 
لێدوانی فەرمی: ئیدریس عەبدوڵڵا، جێگری سەرۆکی شارەوانی زاخۆ بە ئاڤا میدیای ڕاگەیاند، "11 هەزار پارچە زەوی لە سنووری ئیدارەی سەربەخۆی زاخۆ ئامادەن و دوای پەسەندکردنی نەخشەکە لە ئەنجوومەنی شارەوانی و ئیدارەی سەربەخۆ بە قۆناغ تیروپشک بۆ دابەشکردنیان دەکەین."
 
ئەوەی پێویستە بیزانیت: نزیکەی ساڵێکە هەنگاوەکانی پرۆسەی دابەشکردنی زەوی لە هەرێمی کوردستان دەستیپێکردووە، تاوەکو ئێستا وردبینی و پێداچوونەوە بە فۆڕمی زیاتر لە 360 هەزار فەرمانبەر و پێشمەرگە و خانەنشیندا کراوە بۆ سوودمەندبوون لە پرۆسەکە و ڕەزامەندیشیان لە ئەنجوومەنی وەزیران گەڕاوەتەوە، بەڵام بەشێکی زۆر کەمیان زەوییان وەرگرتووە.