وەزیری کار: تەنها یەک پڕۆژە ئامادەیە یەکەی نیشتەجێبوون بدات بە کەمئەندامان

ئاڤا نیوز

 

وەزیری کار و کاروباری کۆمەڵایەتیی ڕایگەدەیەنێت، تەنیا یەک پڕۆژەی نیشتەجێبوون پابەند بووە بە دابین کردنی یەکەی نیشتەجێبوون بۆ کەمئەندامان بەشێوەی بێ بەرامبەر. 

 

چیرۆکی سەرەکی: بە گوێرەی ماددەی حەوت لە یاسای ژماره‌ (8)ی ساڵی 2021 یاسای هەموارى یەکەمى یاساى ماف و ئیمتیازاتی كەمئەندام و خاوەن پێداویستیی تایبەت لە هەرێمی کوردستان ــ عێراق ژمارە (22)ی ساڵی 2011 هاتووە: "ئەو لایەنانەى پڕۆژەکانى نیشتەجێبوون جێبەجێ دەکەن، بە هەماهەنگى لەگەڵ وەزارەت، پابەند دەبن بە تەرخانکردنى ڕیژەیەکى دیاریکراو لە یەکەکانى نیشتەجێبوون بۆ کەمئەندامان و خاوەن پێداویستیی تایبەت و کورتە باڵایان، بەبێ بەرامبەر، بەمەرجێك بۆ بارودۆخى گوزەران و جەستەییان گونجاو بێت".

 

لێدوانی فەرمی: کوێستان محەممەد، وەزیری کار و کاروباری کۆمەڵایەتیی هەرێمی کوردستان ڕایگەیاند، تا ئێستا تەنیا یەک پرۆژەی نیشتەجێبوون پابەندی هەمواری یاسای کەمئەندامان بووە، بە دابین کردنی 45 یەکەی نیشتەجێبوون بۆ ئەوەی بێبەرامبەر بەسەر کەمئەندامان دابەشی بکەین.

 

لەلایەکی دیکەوە: بەرگەشت ئاکرەیی، گوتەبیژی دەستەی وەبەرهێنان بە ئاڤای گوت، تا ئێستا یاساکە و ڕێنمایی جێبەجێکردنی نەگەیشتۆتە دەستەی وەبەرهێنان بۆ ئەوەی لە پێدانی مۆڵەت بە پرۆژەکانی نیشتەجێبوون کاری پێبکرێت.