دوای جەژن وەرگرتنی گەنم لە سایلۆکانی هەرێمی کوردستان دەستپێدەکات

ئاڤا نیوز

 

سایلۆکانی پارێزگاکانی هەرێمی کوردستان ئامادەکاری بۆ وەرگرتنی گەنمی جووتیاران دەکەن و دوای جەژن پرۆسەی وەرگرتنەکە دەستپێدەکات.

 

وێنە گەورەکە: ئەمساڵ بەگوێرەی پلانی وەزارەتی بازرگانیی عێراق، 400 هەزار تۆن گەنم لە جووتیارانی هەرێمی کوردستان وەردەگرێت، بەڵام کار لەسەر ئەوە دەکرێت گەنمی چوارچێوەی پلانی کشتوکاڵی و دەرەوەی پلانی کشتوکاڵی لە جووتیارانی هەرێمی کوردستانیش وەربگیرێت.

 

لێدوانە فەرمییەکان: میران پشدەری، بەڕێوەبەری سایلۆی هەولێر بە ئاڤای گوت، "12-06-2025، لە سایلۆی هەولێر دەست بە وەرگرتنی گەنمی جووتیاران دەکەین، ئەمساڵ ناتوانین لە سایلۆی قوشتەپە گەنم وەرگرین، چونکە پڕ بووە و گەنمی ساڵی ڕابردوو ماوەتەوە."

ئەحمەد جەمیل، بەڕێوەبەری گشتیی کشتوکاڵی دهۆک بۆ ئاڤا ڕایگەیاند، "لەدوای 10ـی مانگەوە دەست بە وەرگرتنی گەنم دەکەین، سایلۆکانی فایدێ، شێخان، زاخۆ و ڕۆڤیا ئامادەکراون بۆ وەرگرتنی گەنمی جووتیاران."

 

لەلایەکی دیکەوە: نەسرین ئەحمەد، بەڕێوەبەری سایلۆکانی سلێمانی بە ئاڤای ڕاگەیاند، "نووسراوی وەزارەتی بازرگانی و پیشەسازی بۆ هاتووە و لە 10-06-2025، دەست بە وەرگرتنی گەنمی جووتیاران دەکەین، شەش سایلۆ دابینکراون بۆ ئەو مەبەستە."

 

ژمارەکان وادەڵێن: ئەو 400 هەزار تۆنەی بڕیارە لە جووتیارانی هەرێمی کوردستانی وەرگرن، بەمشێوەیە بەسەر چوار پارێزگاکەی هەرێمی کوردستان دابەشکراوە:-

هەولێر: 122 هەزار و 600 تۆن.
سلێمانی: 145 هەزار و 567 تۆن.
دهۆک: 117 هەزار و 911 تۆن.
هەڵەبجە: 13 هەزار و 923 تۆن.