لە سۆران تەنیا لە سێ ساڵدا زیاتر لە 100 ئۆتۆمبێل سووتاون

ئاڤا نیوز

لەماوەی سێ ساڵی ڕابردوو 125 ئۆتۆمبێل لە سۆران لە وەرزی هاویندا سوتاون. بەرگریی شارستانیی سۆرانیش داوا لە شۆفێران دەکات ئاگر کوژێنەوە لەناو ئۆتۆمبێلەکانیان دابنێن.

وێنە گەورەکە: ساڵانە لەگەڵ هاتنی وەرزی هاوین و گەرما بەشێکی زۆری ئۆتۆمبێلەکان گڕ دەگرن و دەسووتێن. لە شاری سۆرانیش لە ماوەی سێ ساڵی ڕابردوو ژمارەیەکی زۆر ئۆتۆمبێل بەهۆکاری جیاجیا سووتاون.

لێدوانی فەرمی: ڕەوەند هاودییانی: وتەبێژی پۆلیسی بەرگریی شارستانیی سۆران بە ئاڤای ڕاگەیاند، لە سنوری ئیدارەی سەربەخۆی سۆران لە ماوەی سێ ساڵی رابردوو 125 ئۆتۆمبێلی جۆراو جۆر سوتاون. هاوکات لە ماوەی شەش مانگی ئەمساڵیش زیاتر لە 10ئۆتۆمبێل سوتاون.

بەرگری شارستانی سۆران، ڕێنمای بە شوفێران دەدات و داواکارە کە ئاگر کوژێنەوەی دەستی بەرێژەی 4 کیلۆیی لە ئۆتۆمبێلەکانیان دابنێن.

ئەوەی لەوبارەیەوە دەگوترێت: چەند شارەزایەکی میکانیکیی ئۆتۆمبێل لە سۆران هۆکارەکەی بۆ  خراپی کوالێتی بەنزین و کێشەی کارەبایی و خراپی کەلوپەلی هاوردەی ئۆتۆمبێلەکان دەگەڕێننەوە، بەتایبەت ئەو ئۆتۆمبێلانەی کە لە وڵاتی ئیمارات هاوردەی هەرێمی کوردستان کراون.