پارێزگای هەولێر داوایەك ئاراستەی هاووڵاتیان دەكات

ئاڤا نیوز

پارێزگای هەولێر، وێڕای ئامادەكاری بۆ ڕۆژانی جەژنی قوربان سەبارەت بە بڵاوبوونەوەی نەخۆشیی تای خوێنبەربوون، داوایەك ئاراستەی دانیشتووانی پارێزگاكە دەكات.

وێنە گەورەكە: بەمەبەستی ئامادەكاری بۆ ڕۆژانی جەژنی قوربان، ئەمرۆ سێشەممە 2025.6.3، ئومێد خۆشناو، پارێزگاری هەولێر سەرپەرشتیی كۆبوونەوەیەكی كرد كە بەرپرسانی لایەنە پەیوەندیدارەكانی سنووری پارێزگاكە ئامادەی بوون.

ڕاگەیێنراوی فەرمی: پارێزگای هەولێر ڕایگەیاند: لە كۆبوونەوەكەدا وەک ئامادەکاریی بۆ جەژنى قوربان، لیژنەکانی قائیمقامییەتەکان و بازرگانی ڕاسپێردران لە نزیکەوە چاودێرى بازاڕ و نرخ و کوالێتى کەلوپەل و پێداویستییەکانى هاووڵاتیان بکەن.

- لە تەوەرێکى دیکەی کۆبوونەوەکەدا، سەبارەت بە مەترسییەکانى (تای خوێنبه‌ربوون) کە نه‌خۆشییه‌كی ڤایرۆسی زۆر مه‌ترسیداره‌ بۆ سه‌ر ژیانی مرۆڤ و له‌ ڕێگه‌ی ئاژه‌ڵه‌وه‌ بۆ مرۆڤ ده‌گوازرێته‌وه‌، گفتوگۆ کرا. لەو بارەیەشەوە داواکرا هاووڵاتییان بۆ سەلامەتى تەندروستى خۆیان و ماڵ و منداڵ و کەس و کاریان قوربانى لە بەردەم دوکان، سەر شەقام، گەڕەک و کۆڵانەکان نەکەن و ئاژەڵ لە کوشتارگەکان بە پشکنینى ڤێتەرنەرى سەرببڕدرێت و بکرێتە قوربانى.

- سەبارەت بە ئامادەباشی هێزەکانی پۆلیس و ئاسایشى ناوخۆ لە ڕۆژانى جەژن و پاراستنى ئاسایش و ئارامى هەولێرى پایتەخت و سەر و ماڵ و گیانى هاووڵاتییان، کۆبوونەوە جەختی لە گرتنەبەرى هەموو ڕێکارێکى پێویست لە یەکە کارگێڕی و ئیدارییەکان و هێزە ئەمنییەکان و تیمە تەندروستییەکان و فەرمانگە خزمەتگوزارییەکان بۆ بەجێگەیاندنی ئەرکەکانیان کردەوە.