تووشبووێکی دیکە بە تای خوێنبەربوون لە زاخۆ تۆمار کرا

ئاڤا نیوز

پیاوێکی تەمەن 28 ساڵ کە خەڵکی بیکۆڤایە لە قەزای باتیفا، تووشی نەخۆشی تای خوێنبەربوون بووە و ئێستا لە ژێرد چاودێریی پزیشکیدایە.

وێنە گەورەکە: دوای بوونی چەندین گومانلێکراو بە نەخۆشی تای خوێنبەربوون لە هەرێمی کوردستان، لەماوەی دوو مانگی ڕابردوو تەنیا پێنج تووشبوو دەسنیشانکراون و پشتڕاستکراوەنەتەوە، یەکێک لە تووشبووانیش گیانی لەدەستداوە.

ڕاگەیێنراوی فەرمی: وەزارەتی تەندروستی حکومەتی هەرێمی کوردستان ڕایگەیاند، ئەو کەسەی تووشی نەخۆشی تای خوێنبەربوون بووە پیشەی ئاژەڵدارە و بەرکەوتەی ئاژەڵی تووشبوو بووە، دوای گومانلێکردن بە نەخۆشی تای خوێنبەربوون و بوونی نیشانەکانی و چەندین ڕێکاری دەستنیشانکردن و چارەسەری پزیشکی گیراوەتەبەر، ئێستا لەژێر چاودێریی پزیشکی لە نەخۆشخانە خەوێندراوە و چارەسەر وەردەگرێت و تا ئێستا باری تەندروستی جێگیرە.

وەزارەتی تەندروستی، "داوا لە هاووڵاتیان دەکەین و جەخت دەکەینەوە لەسەر جێبەجێکردنی ڕێنماییەکانی وەزارەتی تەندروستی، لەکاتی بوونی گومان و نیشانەکانی نەخۆشی لەسەر ئاژەڵ پێویستە تیمەکانی ڤێتەرنەری ئاگاداربکەنەوە"، هاوکات بەرکەوتووانی بەخێوکردنی ئاژەڵ یان بەرهەمەکانی ئاژەڵ لەکاتی بوونی هەر نیشانەیەکی ناتەندروست، بەخێرایی سەردانی نەخۆشخانەکان بکەن بێ دواکەوتن.

ئەوەی پێویستە بیزانیت: سەجەم ئەو کەسانەی لە هەرێمی کوردستان تووشی نەخۆشی تای خوێنبەربوون بوون، تەنیا یەکێکیان لەبەر قورسی باری تەندروستی گیانی لەدەستدا و ئەوانەی دیکە بەتەواوی چاکبوونەتەوە و لە نەخۆشخانە دەرچوونە.