ئەنجوومەنی وەزیران پرسی نەناردنی مووچە لەلایەن بەغداوە تاوتوێ دەکات

ئاڤا نیوز

 

ئەنجوومەنی وەزیرانی هەرێمی کوردستان، بەسەرپەرشتی سەرۆکوەزیران مەسرور بارزانی کۆدەبێتەوە و پرسی مووچەی مووچەخۆران و دوو تەوەری دیکە تاوتوێ دەکات.

 

وێنە گەورەکە: بڕیاری ڕاگرتنی 8 مووچەی ئەمساڵ لەلایەن وەزارەتی دارایی عێراق و محەممەد شیاع سوودانی، کاردانەوەی تووندی لە ناوخۆی کوردستان لێ کەوتووەتەوە، لەو چوارچێوەیەشدا لە کۆبوونەوەی ئەمڕۆی ئەنجوومەنی وەزیران هەڵوەستەی لەسەر دەکرێت.

 

زانیاریی تایبەت: پێشنیوەڕۆی ئەمڕۆ چوارشەممە، ئەنجوومەنی وەزیرانی هەرێمی کوردستان بەسەرپەرشتی سەرۆکوەزیران مەسرور بارزانی کۆدەبێتەوە و لە بڕگەی یەکەم پرسی نەناردنی مووچە لەلایەن بەغدا تاوتوێ دەکەن.

 

زانیاریی زیاتر: لە بڕگەی دووەم، وەزارەتی شەهیدان و ئەنفالکراوان، جێبەجێکردنی پێشنیازێکی حکومەت لەبارەی لێخۆشبوون لە پێشینەی هاوسەرگیری لە کوڕ و کچی شەهیدان دەخاتەڕوو.

 

ئەمەش بزانە:  لە بڕگەی سێیەم، نووسراوی سەرۆکایەتیی دیوانی ئەنجوومەنی وەزیران، پەیوەست بە گرێبەستی کارمەندان لەسەر بودجەی پەرەپێدان و داهات باس دەکرێت.