فارس عیسا: هەولێر بۆ چارەسەری کێشە داراییەکان چەندین کارتی فشاری لەبەردەستە

ئاڤا نیوز

 

سەرۆکی نوێنەرایەتیی حکومەتی هەرێمی کوردستان لە بەغدا دەڵێت، "هەرێمی کوردستان بۆ چارەسەری قەیران و کێشە داراییەکان "لاواز" نییە و چەندین کارتی فشاری لەبەردەستە، جەختیش دەکاتەوە لەوەی "هەولێر خۆی ناچەمێنێت".

 

وێنە گەورەکە: لە 28ـی ئایارەوە وەزارەتی دارایی عێراق بڕیاری ڕاگرتنی مووچەی فەرمانبەرانی هەرێمی کوردستانی دەرکردووە، ڕۆژی سێشەممەش ئەنجوومەنی وەزیرانی عێراق کۆبووەوە و لەم بارەیەوە هیچ بڕیارێکی دەرنەکرد، بۆیەش دیارنییە بۆ جەژن بەغدا مووچەی فەرمانبەرانی کوردستان ڕەوانە دەکات یاخود نا.

 

ڕاگەیێنراوی فەرمی: فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا لە پەیامێکدا کە لە هەژماری تایبەتی خۆی لە فەیسبووک بڵاویکردووەتەوە، ئاماژەی بەوەکردووە، "بۆ تێپەڕاندنی قەیرانەکان لەناویاندا قەیرانی دارایی و چارەسەری کێشەکانی دیکە، هەرێم لاواز نییە وەک ئەوەی هەندێک گومان دەکەن، بەڵکو چەندین کارتی فشار و ڕێگای چارەسەرکردنی هەیە، لەوانەش ڕێکاری یاسایی و دەستووریی ئەوە جگە لە هاوبەشە نیشتیمانیی و نێودەوڵەتییەکانمان، هەولێر خۆی ناچەمێنێت".