ئاگادارییەکی خێرا بۆ خەڵکی دهۆک و زاخۆ لەبارەی لافاو

ئاڤا نیوز

پارێزگاری دهۆک و ئیدارەی سەربەخۆی زاخۆ هۆشداری بە هاونیشتمانیان دەدەن بەهۆی ناجێگیریی ڕەوشی کەشوهەوا و هەستکردن بە مەترسی، بۆ کارێکی گرنگ و پێویست نەبێت لە ماڵ دەرنەچن.

وێنە گەورەکە: شەپۆلێکی چڕی بارانبارین سەنتەری شاری دهۆک و دەوروبەری گرتووەتەوە،  لە چەند شەقام و شوێنێک لافاو دروست بووە، دوو کەس گیانیان لە دەست داوە و زیانێکی ماددی زۆریشی لێکەوتووەتەوە. 

لێدوانی فەرمی: عەلی تەتەر، پارێزگاری دهۆک بە ئاڤا نیوزی ڕاگەیاند: بەهۆی ناجێگیریی ڕەوشی کەشوهەوا و هەستکردن بە مەترسی، داوا لە هاووڵاتیان دەکەم تاوەکو کۆتاییهاتنی بارانبارین بۆ کارێکی زۆر گرنگ نەبێ لە ماڵەکانیان دەرنەچن.

لەلایەکی دیکەوە: سەرۆکایەتیی ئیدارەی سەربەخۆی زاخۆ لە ڕاگەیێنراوێکدا بە هەمانشێوە داوای لە خەڵک کرد بەهۆی بەردەوامبوونی بارانبارین و هەبوونی مەترسی بۆ کارێکی پێویست و خێرا نەبێت لە ماڵ دەرنەچن.