ئەمریکا دەستگیرکردنی سەرکردەیەکی داعشی لە عێراق ڕاگەیاند

ئاڤا نیوز

 

فەرماندەیی ناوەندیی هێزەکانی ئەمریکا (سێنتکۆم) دەستگیرکردنی سەرکردەیەکی داعشی بە هەماهەنگی هێزەکانی عێراق ڕاگەیاند، ئاشکراشی کرد کە کۆتایی مانگی ڕابردوو لە عێراق و سووریا شەش ئۆپەراسیۆنیان دژی داعش بە هاوکاری هەسەدە و هێزەکانی عێراق ئەنجام داوە.

 

وێنە گەورەکە: بۆ لەناوبردنی داعش لە عێراق  و سووریا و ڕێگری لە سەرهەڵدانەوەی، ماوەی 11 ساڵە ئەمریکا سەرۆکایەتیی هاوپەیمانیی نێودەوڵەتیی دژی داعش دەکات کە دەیان وڵاتی جیهان تیایدا بەشدارن، بەرپرسانی ئەو وڵاتە و عێراقیش هۆشداریی لە بەردەوامی مەترسییەکانی داعش دەدەن.

 
ڕاگەیێنراوی فەرمی: فەرماندەیی ناوەندیی هێزەکانی ئەمریکا (سێنتکۆم) بڵاویکردەوە، لە نێوان 21 تا 27ی ئایار بە هاوکاریی هێزەکانی سووریای دیموکرات (هەسەدە) و هێزەکانی عێراق، شەش ئۆپەراسیۆن دژی داعش ئەنجام دراون، لە ئەنجامیشدا دوو چەکداری ڕێكخراوەکە کوژراون و دووی دیکەش دەستگیرکراون کە یەکێکیان سەرکردەی داعش بووە.

 

ئەو مانایە دەگەیێنێت: هەرچەندە سێنتکۆم ناوی سەرکردەکەی داعش و پۆستەکەی لەناو ئەو ڕێکخراوەکەدا ئاشكرا نەکردووە، بەڵام دەستگیرکردنەکەی لە چوارچێوەی ئۆپەراسیۆنەکانی ناو عێراق بڵاوکردووەتەوە، ئەوەش مانای وایە ئەو سەرکردەیەی داعش لە عێراق دەستگیرکراوە.

 

لەلایەکی دیکەوە: جەنەرال مایکڵ ئێرێک کوریلا، فەرماندەی فەرماندەیی ناوەندیی هێزەکانی ئەمریکا دەڵێت، ئەو ئۆپەراسیۆنانە سەلمێنەری پابەندیی ئەمریکایە بە لەناوبردنی یەکجارەکی داعش لە ناوچەکەدا، ئەویش بە هاوکاریی هاوپەیمان و هاوبەشەکانیان.