لە یەک ڕۆژ زیاتر چوار هەزار کەس فۆڕمی بوون بە کارمەندی سەر سندووقەکانی دەنگدانیان پڕکردووەتەوە

ئاڤا نیوز

لە یەکەم ڕۆژی کاراکردنی لینکی دامەزراندنی کارمەندانی سەر سندووقەکانی دەنگدان، لە هەرێمی کوردستان چوار هەزار و 464 کەس فۆڕمەکەیان پڕکردۆتەوە.

چیرۆکی سەرەکی: ڕۆژی سێی ئەم مانگە کۆمسیۆنی باڵای سەربەخۆی هەڵبژاردنەکان، دامەزراندنی کارمەندانی سەر سندووقەکانی دەنگدانی بۆ هەڵبژاردنی پەرلەمانی عێراق ڕاگەیاند، پێشکەش کردن لەڕێگەی لینکی ئەلیکترۆنی دەکرێت، کە تا 2025-07-09 بەردەوام دەبێت.

لێدوانی فەرمی: بۆتان شێرکۆ، یاریدەدەری تەکنیکیی لە ئۆفیسی هەولێری کۆمسیۆن بە ئاڤای گوت: هەر کەسێک مەرجەکانی تێدا بێت دەتوانێت فۆڕمی ئەلیکترۆنی پڕبکاتەوە، دواتر ڕایبکێشێت و لە نزیکترین بنکەی نوێکردنەوەی تۆماری دەنگدەران پیشکەشی بکات، دوای تەواو بوونی ماوەی پێشکەشکردن ناوەکان بە تیروپشک هەڵدەبژێردرێن.

زانیاریی بەدەستهاتوو: لە یەکەم ڕۆژی کاراکردنی لینکەکە لە سەرتاسەری عێراق 58 هەزار و 540 کەس داواکاری پێشکەش کردووە، لەو ژمارەیە چوار هەزار و 464 کەس لە هەر سێ پارێزگای هەولێر، سلێمانی و دهۆک بووە:

هەولێر : هەزار و 626 کەس

سلێمانی : هەزار و 677 کەس

دهۆک: هەزار و 161 کەس

ئەوەی پێویستە بیزانیت: بۆ پڕۆسەی هەڵبژاردن هەرێمی کوردستان پێویستی بە نزیکەی 42 هەزار کارمەندی سەر سندووق هەیە، کە بەشێوەی گرێبەستی کاتی بۆ ڕۆژانی هەڵبژاردن، دەنگدانی تایبەت و دەنگدانی گشتیی دادەمەزرێنێن.