شارەزایەکی ئابووری بۆ ئاڤا: بانکی ناوەندی ناتوانێت دیناری زیاتر چاپ بکات

ئاڤا نیوز

شارەزایەکی بواری دارایی و ئابووری، هۆکارەکانی کەمی پارەی نەختینە  لە عێراق بۆ ئاڤا ئاشکرا دەکات و دەڵێت "بانکی ناوەندی ناتوانێت لەمەودوا دیناری زیاتر چاپ بکات".

وێنە گەورەکە: بەگوێرەی بەشێک لە ئەندامانی پەرلەمان،  عێراق بە قەیرانێکی سەختی دارایی تێدەپەڕێت و  کەمی پارەی نەختینە  لەمانگەکانی داهاتوودا  کێشە بۆ مووچەی فەرمانبەرانی عێراقیش درووست دەکات.

لێدوانی فەرمی: ئەحمەد عەبد ڕەببە، شارەزای بوواری دارایی و ئابووری بەئاڤا میدیای ڕاگەیاند: هۆکارەکانی قەیرانی کەمی پارەی نەختینە لە عێراق زۆرن، دیارترینیان:

- دابەزینی نرخی نەوتەکە بووەتە هۆی کورتهێنان لە داهاتدا.

- کەمبوونەوەی دراوە جیهانییەکان و سنووردارکردنی مامەڵەی کاش بەو دراوانەوە بەتایبەتی دۆلار.

- بانکی ناوەندی ناتوانێت دیناری زیاتر چاپ بکات بەبێ ئەوەی یەدەگی دراوی بیانی پێویستی هەبێت.

- کەمتەرخەمی لە بەڕێوەبردنی سەرچاوە داراییەکان، هەڵئاوسانی خەرجییەکانی کارکردن لە دامودەزگاکانی دەوڵەتدا و جێبەجێنەکردنی چاکسازیی ئابووری.

لەلایەکی دیکەوە: مەزهەر محەممەد ساڵح، ڕاوێژکاریی ئابووریی سەرۆکوەزیرانی عێراق ئاماژەی بەوەکرد، ئەوەی لە بارەی گەورەکردنی کێشەکانی نەختینەوە دەگوترێت، بەتایبەتی لەجێبەجێکردنی ڕێڕەوی سیاسەتی دارایی و دراو لە عێراقدا، بۆچوونی کەسین و لە ڕاستییەوە دوورن.