كەمال كەركووكی: كورد ڕووبەڕووی سیاسەتی نوێی ستەمكارانە دەبێتەوە

ئاڤا نیوز

بەرپرسی پەیوەندییە گشتییەکانی پارتی دیموکراتی کوردستان‎ ڕایدەگەیەنێت، گەلی کوردستان ڕووبەڕووی سیاسەتی نوێی ستەمکارانە دەبێتەوە و بەغدا بە ئەنقەست قەیران دروست دەکات، بەجێگەی گەڕانەوە بۆ دەستوور و میکانیزمە یاسایی و دامەزراوەییەکان لە چارەسەرکردنی ناکۆکییەکاندا.

چیرۆكی سەرەكی: لە یەكەم ڕۆژی جەژنی قوربانی پیرۆزدا، د. کەمال کەرکووکی، بەرپرسی پەیوەندییە گشتییەکانی پارتی دیموکراتی کوردستان، پەیامێكی پیرۆزبایی بڵاوكردەوە، لە پەیامەكەیدا پرسی بڕینی مووچەی مووچەخۆرانی هەرێمی كوردستانی باسكردووە  بە سیاسەتی نوێی ستەمكارانە بەرامبەر گەلی كوردستان وەسفی دەكات.

پەیامی فەرمی: كەمال كەركووكی لە پەیامەكەیدا ئاماژەی بەوەكرد، بڕیاری بڕینی مووچەی فەرمانبەرانی هەرێمی كوردستان، هەنگاوێکی مایەی سەرسوڕمانێکی بەرفراوان بوو بەهۆی ڕەهەندە سیاسی و مرۆییەکانی و هەستیاریی کاتی و ناوەڕۆکیەوە، بەڵام ئەوەی ڕوونە؛ ئەم بڕیارە لە چوارچێوەی هەوڵەکانی دوورخستنەوەی سەرنجە لەو ئاڵنگارییە جەوهەرییانەی بەردەم حکومەتی عێراق لە بواری پێشکەشکردنی خزمەتگوزاری و بەدیهێنانی گەشەپێدان و چارەسەرکردنی دۆسیەکانی گەندەڵی و بەفیڕۆدانی داراییدا.

كەركووكی دووپاتیشی دەكاتەوە، بەغدا بە ئەنقەست قەیران دروست دەكات، لەجیاتی گەڕانەوە بۆ دەستوور و میکانیزمە یاسایی و دامەزراوەییەکان لە چارەسەرکردنی ناکۆکییەکاندا.

زانیاریی زیاتر: ئەو هەنگاوەی بەغدا کە لە سەر بیانووی بێ بنەمای دەستووری و یاسایی بونیادنراوە، سەرپێچییەکی ڕوون و ئاشکرای دەستووری عێراق و یاسای بودجەی فیدراڵیە. چونکە ماددە پەیوەندیدارەکان باسی بڕینی پارەدارکردن ناکەن، بەڵکو باسی میکانیزمی ڕوون بۆ چارەسەرکردنی ناکۆکییەکان (ئەگەر بە ڕاستی هەبن) دەکەن، لە ڕێگەی لیژنە پسپۆڕەکانەوە نەک بە سەپاندنی سزای بەکۆمەڵ.

باكگراوند: وەزارەتی دارایی عێراق بە واژۆی تەیف سامی، وەزیری دارایی بەر لە جەژن، بەدیاریكراوی لە ڕۆژی 28-5-2025، بەشێوەیەكی كتوپڕ و چاوەڕواننەكراو، بڕیاری ڕاگرتنی 8 مووچەی ئەمساڵی هەرێمی كوردستانی دا، بە پاساوی ئەوەی هەرێمی كوردستان بڕی پشكی خۆی لە یاسای بودجە تێپەڕاندووە.