"بە پارە بڕوانامەیان بە قوتابیانی عێراقی داوە"؛ لە تورکیا چوار قوتابخانەی ناحکومی دادەخرێن

ئاڤا نیوز

 

ئەندامێکی پەرلەمانی عێراق دەڵێت، چوار قوتابخانەی ناحکومی لە تورکیا داخراون بەهۆی ئەوەی بەبێ خوێندن و ئامادەبوونی ڕاستەقینەیان، بڕوانامەی خوێندنی ئامادەییان بە کۆنمرەی بەرز بە قوتابیانی عێراقی داوە.

 

وێنە گەورەکە: بەگوێرەی نوسراوەکانی وەزارەتی دەرەوەی عێراق بەشێک لەو قوتابیانە کە لە پۆلی 12ی ئامادەیی لەو قوتابخانانەی تورکیا خوێندوویانە کە خوێندنیش بە زمانی تورکییە، کۆنمرەی تا 97یان پێدراوە، لەکاتێکدا نمرەکانیان لە قوتابخانەکانی عێراق لە خوار مامناوەند بووە.

 
لێدوانی فەرمی: د.حەیدەر مەتیری، ئەندامی لیژنەی پەروەردە لە پەرلەمانی عێراق دەرئەنجامی بەدواداچوونێکی خۆی لەسەر ئەم دۆسییەیە بڵاوکردەوە کە ماوەی 10 مانگی خایاندووە، ئەوەشی خستەڕوو، بەهۆی بەدواداچوونەکە، چوار قوتابخانە داخراون و چواری دیکەش سزادراون، هاوکات وەزارەتی پەروەردەش بڕیاریداوە چاودێریی توند بخاتەسەر ئەو بڕوانامانەی لە تورکیاوە دەهێنرێنەوە و تا لە ماوەی مانەوەی قوتابییەکە لەو وڵاتە دڵنیا نەبێت، بڕوانامەکەی پەسەند ناکات.

 

گۆشەیەکی دیکەی دیمەنەکە: حکومەتی عێراق دان بە بڕوانامەی قوتابخانە ناحکومییەکانی تورکیادا نانێت، بۆیەش ئەو قوتابیانە و کەسوکاریان پێش گواستنەوەیان بۆ عێراق، دۆسییەی قوتابییەکانیان بۆ خوێندنی حکومی لە تورکیا گواستووەتەوە و دواتر بڕوانامەکانیان بۆ عێراق هێناوەتەوە تا لە زانکۆکان پێی بخوێنن، وەزارەتی دەرەوەی عێراق دەڵێت، بەشێک لەو قوتابیانە تەنیا چەند هەفتەیەک لە تورکیا بوون و بڕوانامەکانیان پێویستی بە وردبینییە و نابێت پەسەند بکرێن.